އެންމެ ކުޑަ އަގެއްގައި ކޮވިޑް ޓެސްޓު ހަދައިދެނީ އޭޑީކޭއިން: އައްފާލް
އެންމެ ހެޔޮ އަގެއްގައި ކޮވިޑް-19 އަށް ޓެސްޓު ހަދައިދެނީ އޭޑީކޭ ހޮސްޕިޓަލުގައި ކަމަށް އެ ހޮސްޕިޓަލްގެ މެނޭޖިން ޑިރެކްޓަރު އަހުމަދު އައްފާލް ވިދާޅުވެއްޖެ އެވެ.
އޭޑީކޭ ހޮސްޕިޓަލުން ކޮވިޑް-19 އަށް ޓެސްޓް ހަދައިދެމުން އަންނަ އަގަކީ ބޮޑު އަގެއް ކަމަށް ބުނެ އެ ހޮސްޕިޓަލަށް ގިނަ ބަޔަކު އަންނަނީ ފާޑުކިޔަމުންނެވެ.
މިވަގުތު ރާއްޖޭގައި ކޮވިޑަށް ޓެސްޓްކުރަމުން އަންނަނީ ތިން ތަނަކުންނެވެ. އެއީ އައިޖީއެމްއެޗުންނާއި އޭޑީކޭ އަދި ފުލުހުންގެ ފޮރިންސިކް ލެބްގައި ހުރި މެޝިނެއް ބޭނުންކޮށްގެންނެވެ. އެގޮތުން އޭޑީކޭ ހޮސްޕިޓަލުން ޓެސްޓް ހަދައިދެމުން އަންނަނީ ޓެސްޓަކަށް 675 ރުފިޔާގެ ރޭޓުންނެވެ.
ރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އައްފާލް ވިދާޅުވީ އެ ހޮސްޕިޓަލުން ކޮވިޑް-19 ގެ ޓެސްޓަކަށް ނަގަނީ 675ރ. ކަމަށެވެ. އިތުރު އަގުތަކެއް ނޫޅޭނެ ކަމަށް އޭނާ ވިދާޅުވި އެވެ.
"ޔުނިޓް ކޮސްޓެއް މީގައި ހަދައިފި ކަމަށް ވަންޏާ ޓެކްސް ޕޭއާއެކު ދައްކާނެ ހަމަ އެންމެ ކުޑަ އަގޭ އަޅުގަނޑުމެން މި ނަގަނީ،" އަފްއާލް ވިދާޅުވި އެވެ.
އައްފާލް ވިދާޅުވީ ޕީސީއާރު މެޝިނެއް ގެނެސް ބެހެއްޓުމުން ކޮވިޑް ޓެސްޓެއް ނުހެދޭނެ ކަމަށާއި ޓެސްޓް ހަދަނީ ލެބެއްގެ ތެރޭގައި އާ ލެބެއް ގާއިމުކޮށްގެން ކަމަށެވެ.
އައްފާލް އިތުރަށް ވިދާޅުވީ އެކަމަކީ ވަރަށް ބައިވަރު މަސައްކަތް ކަމަށާއި އެގޮތުން ޕީސީއާރު މެޝިނެއް ހޯދުމަށް މިއަހަރުގެ ފެބްރުއަރީ މަހުގައި އޯޑަރުދިންއިރު އެ ލިބުނީ މިދިޔަ މޭ މަހު ކަމަށެވެ.
ރާއްޖޭގެ ފުރަތަމަ އަމިއްލަ ހޮސްޕިޓަލުން ވަނީ ކޮވިޑް-19 އަށް ޓެސްޓު ކުރުމަށް ޕީސީއާރު މެޝިނެއް ގެނެސް މިދިޔަ މަހުގެ ފަހުކޮޅުން ފެށިގެން ޚިދުމަތް ފަށައިފަ އެވެ. އެއާ އެކު، ސަރުކާރުން އަންނަނީ އޭޑީކޭ ހޮސްޕިޓަލުގެ ލެބޯރެޓަރީ ވެސް ބޭނުންކުރަމުންނެވެ.
އެ ހޮސްޕިޓަލުގައި ހަދާ ކޮވިޑް-19 ގެ ހުރިހާ ޓެސްޓަކަށް ސަރުކާރުން ފައިސާ ދޭނެ އެވެ.
Ads by STO
