ރައީސް ނަޝީދަށް ޖަލްސާގައި އިދިކޮޅު މެމްބަރުން ނެތްކަން ފާހަގައެއް ނުކުރެވުނު!
ރައްޔިތުންގެ މަޖިލިސް ޖަލްސާ އަށް އިދިކޮޅު ޕާޓީތަކުން މެމްބަރުން ވަޑައިނުގެންނެވި ނަމަވެސް އެކަން އެއްވެސް ވަރަކަށް ފާހަގަވެވަޑައި ނުގަންނަވާ ކަމަށް ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ނައިފަރު ދާއިރާގެ މެމްބަރުން އަހުމަދު ޝީޔާމަށް މަޖިލީހުގައި އަނިޔާކުރި ކަމަށް ބުނެ އިއްޔެ އާއި މިއަދުގެ މަޖިލިސް ޖަލްސާވެސް އިދިކޮޅު ކޯލިޝަނުން ވަނީ ބޮއިކޮޓު ކޮށްފައެވެ.
ރައްޔިތުން މަޖިލީހުގެ މިއަދުގެ ޖަލްސާގައި ވާހަކަދައްކަވަމުން ނަޝީދު ވިދާޅުވީ އިދިކޮޅު މެމްބަރުން މަޖިލީހަށް ވަޑައިނުގަންނަވާކަން އެހާ ބޮޑަށް ފާހަގަނުވަނީ އެއީ ކުރިން ވެސް އެހާ ގިނައިން މަޖިލީހަށް ވަޑައިގަންނަވާ މެމްބަރުންނަށް ނުވާތީ ކަމަށް ވެދާނެ ކަމަށެވެ.
ނަޝީދު ވިދާޅުވީ، ވ. ފުލިދޫ ދާއިރާގެ މެމްބަރު ފަޒުލް ރަޝީދާ އެކު، ދެތިން މެމްބަރަކު މަޖިލީހަށް ވަޑައިނުގަންނަވާ ކަމަށާއި ނަމަވެސް އެއީ އާންމުކޮށް ވެސް އެހެން އުޅުއްވާ މެމްބަރުންނަށް ވާތީ އެކަން ފާހަގަ ނުވަނީ ކަމަށް ވެދާނެ ކަމަށެވެ.
މި މަހުގެ ދެވަނަ ދުވަހުގެރޭ ބޭއްވި ޖަލްސާގައި މަޖިލީހުގެ ރައީސް ނަޝީދު އެމްޑީޕީގެ މެމްބަރުން ލައްވާ ޝިޔާމް އަށް އަނިޔާކޮށް، ޝިޔާމްގެ ހާލު ދެނެގަތުމަށް ޖަލްސާކުރާ މާލަމުން ނިކުންނެވި އިދިކޮޅު މެމްބަރުން ޖަލްސާގައި ބައިވެރިނުކޮށް، އަދި މެމްބަރުންނަށް ވާހަކަ ދެއްކުމާއި ވޯޓު ލުމުގެ ހައްގު ވެސް ނިގުޅައިގެންފައިވާ ކަމަށ އިދިކޮޅުން ބުނެއެވެ.
އަދި މަޖިލީހުގައި އިދިކޮޅު މެމްބަރުންނަށް ސަލާމަތާއި ރައްކާތެރިކަމާއެކު، ގާނޫނީ ޒިންމާ އަދާކުރެވޭނެ މާހައުލެއް އޮތް ކަމަށް ނުފެންނަ ކަމަށާއި އެރޭގެ ޖަލްސާގައި ލިބުނު އަނިޔާތަކުގެ ސަބަބުން މެމްބަރު ޝިޔާމުގެ ސިއްހީ ހާލުކޮޅު ގޯސްވެފައިވާތީ އާއި އެކަމާ ގުޅޭ ޖިނާއީ ތަހުގީގެއް ހިނގަމުންދާތީ އިދިކޮޅު މެމްބަރުން މަޖިލީހުގެ ޖަލްސާގައި ވެސް ބައިވެރި ނުވާނެ ކަމަށް ބުނެފައިވެއެވެ.
