"މި ދެ ދުވަހު ޖަލްސާ ބޮއިކޮޓް ކުރީ މަޖިލީހުގެ ރައީސް ގަވާއިދާ ހިލާފުވެ، މާރާމާރީ ހިންގުވާފައި ވާތީ"

އިދިކޮޅު ކޯލިޝަނަށް ނިސްބަތްވެ ވަޑައިގަންނަވާ މެމްބަރުން އިއްޔެއާ މިއަދު މަޖިލީހުގެ ޖަލްސާ ބޮއިކޮޓް ކުރީ މަޖިލީހުގެ ރައީސް މުހައްމަދު ަނަޝީދު ގަވާއިދާ ހިލާފުވެ، މާރާމާރީ ހިންގުވާފައި ވާތީ އިހުތިޖާޖު ކުރުމުގެ ގޮތުން ކަމަށް ޕީއެންސީގެ ނައިބް ރައީސް އަދި މަޑުއްވަރީ ދާއިރާގެ މެމްބަރު އާދަމް ޝަރީފް އުމަރު ވިދާޅުވެއްޖެއެވެ.

Ads by Sosun Fihaara

މިހާރު ތިބި ކައުންސިލަރުންގެ މަގާމުގެ މުއްދަތު ދަންމަން ގާނޫނުއަސާސީ އިސްލާހު ކުރުމަށް މި މަހުގެ ދެވަނަ ވަނަ ދުވަހުގެ ރޭ މެންދަމު ބޭއްވި ރައްޔިތުންގެ މަޖިލީހުގެ ޖަލްސާގައި އިދިކޮޅު ޕީޕީއެމްގެ ނައިބު ރައީސް، ނައިފަރު ދާއިރާގެ މެމްބަރު އަހްމަދު ޝިޔާމްގެ ނަން ރިޔާސަތުން މަޖިލީހުގެ ރައީސް ނަޝީދު އިއްވެވުމުން ޝިޔާމް މަޖިލީހުގެ ތަޅުމުން ނެރުމަށް ނަޝީދުގެ އެންގެވުމަކަށް އެމްޑީޕީގެ ބައެއް މެމްބަރުން އުޅުއްވުމުގެ ތެރޭގައި ހިންގި ހަމަނުޖެހުންތަކާ ގުޅިގެން ޕީޕީއެމާއި ޕީއެންސީގެ މެމްބަރުން ވަނީ މަޖިލީހުގެ ޖަލްސާތައް ބޮއިކޮޓް ކޮށްފައެވެ.

އިދިކޮޅުން ޖަލްސާ ބޮއިކޮޓް ކުރި ނަމަވެސް އެކަން އެއްވެސް ވަރަކަށް ފާހަގަވެވަޑައި ނުގަންނަވާ ކަމަށް ރައީސް ނަޝީދު މިއަދު ވަނީ ވިދާޅުވެފައެވެ.

ނަޝީދަށް ރައްދު ދެއްވައި އާދަމް ޝަރީފް ކުރެއްވި ޓްވީޓެއްގައި ވިދާޅުވީ މަޖިލީހަކީ ޖަންގަލީގައި ސިންގާ ވެރިކަން ކުރާހެން ހިންގަން ހުރި ތަނެއް ނޫން ކަމަށެވެ.

"މަޖިލީގެ ރައީސް މާފަށް އެދެން ޖެހޭ" އާދަމް ޝަރީފް ވިދާޅުވިއެވެ.