8 ފެބްރުއަރީގައި ބޮންޑޭއަށް އަނިޔާކުރި ވީޑިއޯ މަޖިލީހުގައި ދައްކައިފި
އަށެއް ފެބްރުއަރީ 2012ގައި މާލޭގައި އެމްޑީޕީން ކުރި ބޮޑު މުޒާހަރާގައި މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑޭ) އަށް ފުލުހުން އަނިޔާކުރި މަންޒަރު ދައްކައިދޭ ވީޑިއޯ ރައްޔިތުންގެ މަޖިލީހުގެ މިއަދުގެ ޖަލްސާގައި ދައްކައިފި އެވެ.
މި ވީޑިއޯ ދައްކާފައި ވަނީ ސަރުކާރުގެ ފަރާތުން، ހެންވޭރު ހުޅަނގު ދާއިރާ ގެ މެމްބަރު ހަސަން ލަތީފް ހުށަހެޅުއްވި، ދިވެހި ފުލުހުންގެ ހިދުމަތުގެ ބިލަށް ބަހުސް ކުރަމުގެ ތެރެއިން މަޖިލީހުގެ ނައިބު ރައީސް އީވާ އަބްދުﷲ އެކަމަށް އެދިވަޑައިގަތުމުންނެވެ.
އީވާ އެގޮތަށް އެދިވަޑައިގަތުމުން މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވީ އެއީ ބޭނުންތެރި ކަމެއް ކަމަށާއި އެހެން ކަމުން އެ ވީޑިއޯ މަޖިލީހުގައި އަޅުވާނެ ކަމަށެވެ.
އެ ވީޑިއޯއިން ފެންނަނީ މެމްބަރު ބޮންޑޭ މަގުމައްޗަށް ވައްޓާލުމަށް ފަހު، ފުލުހުންތަކެއް ކޮޅުފައިންނާއި މުގުރުންނާއި އަތުން އޭނާގެ ގައިގައި ތަޅާ މަންޒަރެވެ.
މިއަދުގެ ޖަލްސާގައި ފުލުހުންގެ ބިލަށް ބަހުސް ކުރެވުނުއިރު، ގިނަ އެމްޑީޕީ މެމްބަރުންތަކެއް ވަނީ ފުލުހުންނަށް ފާޑުކިޔައި ވާހަކަ ދައްކަވާފައެވެ.
Ads by STO
