ހަފުތާއެއްގެ މަސައްކަތުގެ ވަގުތު 40 ގަޑިއިރަށްވުރެ އިތުރު ކުރަން ޖެހޭ: އިބްރޭ
ރަނގަޅު ނަތީޖާއެއް ނެރުމަށްޓަކައި ރާއްޖޭގެ ހަފުތާއެއްގެ މަސައްކަތުގެ ވަގުތު 40 ގަޑިއިރަށްވުރެ އިތުރުކުރަން ޖެހޭ ކަމަށް ކެލާ ދާއިރާގެ މެމްބަރު އިބްރާޙީމް ޝަރީފް (ކެލާ އިބްރޭ) ވިދާޅުވެއްޖެއެވެ.
އިބްރޭ މިހެން ވިދާޅުވީ އިއްޔެ ސަރުކާރުގެ ފަރާތުން ކެނދިކުޅުދޫ ދާއިރާގެ މެމްބަރު އަހުމަދު އީސާ ހުށަހަޅުއްވާފައިވާ ދިވެހިރާއްޖެގެ ވަޒީފާއާއި ބެހޭ ޤާނޫނަށް އިސްލާހު ގެނައުމުގެ ބިލަށް ބަހުސް ކުރައްވަމުންނެވެ.
އިބްރޭ ވިދާޅުވީ ޤައުމު ހިންގަމުން މި ދަނީ ޓެކްސް ފައިސާއިން ކަމަށާއި ސަރުކާރުގެ މުވައްޒަފުންނަށް މުސާރަދީ އަދި އިޤުތިޞާދީ، އިޖުތިމާޢީ މަސައްކަތްތައް ކުރަމުން ގެންދަނީ ވެސް އެ ޓެކްސް ފައިސާއިން ކަމަށެވެ. އެހެންކަމުން ވިޔަފާރިވެރިން ކުރާ ވިޔަފާރި ވެސް ބަލަން އެބަޖެހޭ ކަމަށް އިބްރޭ ވިދާޅުވިއެވެ.
"ރާއްޖޭގައި މަސައްކަތް މި ކުރަނީ ހަފުތާއަކު 40 ގަޑިއިރު. އާއްމުކޮށް ތަރައްގީވެފައި ހުންނަ ގައުމުތަކުގައި މަސައްކަތް ކުރާ ވަގުތު މިއަށް ވުރެ ގިނަ. އެ މީހުން އެބަ މަސައްކަތް ހަފްތާއެކު 44 ގަޑިއިރު، 46 ގަޑިއިރު. އަޅުގަނޑު ދެކޭ ގޮތުގައި މިއީ ވެސް ވިސްނާލަން ވަރަށް މުހިންމު ނުކުތާއެއް. އަޅުގަނޑުމެންނަށް ގިނައިރު މަސައްކަތްކުރެވިގެން ނޫނީ ނަތީޖާއެއް އަޅުގަނޑުމެންނަށް ނުނެރެވޭނެ." އިބްރޭ ވިދާޅުވިއެވެ.
އޭނާ ވިދާޅުވީ ރާއްޖޭގައި މަސައްކަތުގެ މާހައުލުގައި މާ ގިނަ މެޝިން ބޭނުން ނުކުރާ ކަމަށާއި އެހެންކަމުން މަސައްކަތްކުރާ ގަޑި ވެސް މުރާޖާކުރެވެން އޮވެއްޖެ ނަމަ، މުރާޖާކުރެއްވުން މުހިންމު ކަމަށެވެ.
"އެހެންވީމާ، މި ގަޑިއަކީ ވެސް އަޅުގަނޑު ދެކޭ ގޮތުގައި ވަރަށް މުހިންމު އެއްޗެއް މަސައްކަތްކުރުމުގައި، މި ދަންނަވާ ގޮތަށް ވިޔަފާރިވެރިންނަކީ މި ޤައުމުގެ އެންމެ ބޮޑު ހިއްސާދާރު، އަޅުގަނޑުމެންގެ އިޤްތިޞާދަށް އެންމެ ބޮޑު ހިއްސާއެއް ކުރަނީ ވިޔަފާރިވެރިން ކަމުގައި ވާތީވެ.” މެމްބަރު އިބްރޭ އިތުރަށް ވިދާޅުވެފައި ވެއެވެ.
ވަޒީފާގެ ގާނޫނަށް ހުށަހަޅާފައިވާ އާ އިސްލާހާއި ގުޅިގެން ގިނަ ރައްޔިތުންގެ ދަނީ ނުރުހުން ފާޅު ކުރަމުންނެވެ. އެ އިސްލާހުގައި ވަނީ ބަލީގެ ބާވަތާއި އެބަލީގެ ސަބަބުން މުވައްޒަފަކަށް މަސައްކަތަށް ނުނުކުމެވޭނެ މުއްދަތު ބަޔާންކޮށް، ރަޖިސްޓްރީކޮށްފައިވާ ސިއްހީ މަސައްކަތްތެރިއަކު ދޫކުރާ މެޑިކަލް ސެޓިފިކެޓެއް ވަޒީފާއަށް ނުކުންނަ ދުވަހު ހުށަހެޅުމުން ނޫނީ، އެ މުވައްޒަފަކަށް ސަލާމަތުގެ ޗުއްޓީ ދިނުން ވަޒީފާ ދޭ ފަރާތުގެ މައްޗަށް ލާޒިމުވެގެން ނުވާ ކަމަށެވެ.
Ads by STO
