3،000 ރުފިޔާ ދިނީ އަހަންނަކަށް ނޫން! އަހަންނަށް ރަނގަޅު މުސާރައެއް ލިބޭ: ޝަޔާޙް
ޓޫރިޒަމް މިނިސްޓްރީގެ ވީޑިއޯއަށް ޚަރަދުވީ 3،000 ރުފިޔާއަކީ އެވީޑިއޯގެ މިޔުޒިކް ކޮމްޕޯޒަރަށް ދިން އެއްޗެއް ކަމަށް، ވީޑިއޯ އުފެއްދި ވީޑިއޯގްރާފަރ ޝަޔާހް ޝަފީޤް ބުނެފިއެވެ.
"ދަ ސަން ވިލް ޝައިން އަގެއިން" ކެމްޕޭނުގެ ދަށުން އުފެއްދި އެވީޑިއޯއާއި ގުޅޭގޮތުން ގިނަ ފާޑުކިޔުންތަކެއް އަމާޒުވެފައިވާއިރު، ވީޑިއޯއަށް ބޮޑު ޚަރަދެއް ސަރުކާރުން ކޮށްފައިވާ ކަމަށް ވެސް ވާހަކަ ދެކެވުނެވެ. އެވާހަކަތަކަށް ޖަވާބުދެއްވަމުން ޓޫރިޒަމް މިނިސްޓަރ އަލީ ވަހީދު ވިދާޅުވީ އެވީޑިއޯއަށް ޚަރަދުވީ 3،000 ރުފިޔާ ކަމަށެވެ.
އެއަދަދެ އެނގުމާއެކު ދެން ފާޑުކިޔުން އަމާޒުވީ، ވީޑިއޯގެ މަންޒަރުތައް ނަގައިދިން ވީޑިއޯގްރާފަރ ޝަޔާހް އަށެވެ.
އެގޮތުން "ޓޫރިޒަމް މިނިސްޓަރ ވީޑިއޯގްރާފާސް ގެ އަގު ވައްޓާލަނީ" ކަމަށާއި "3،000 އަށް މަރުވެފައި އޮތް މީދާވެސް ވީޑިއޯ ނުކޮށްދޭނެ" ކަމަށް ބައެއް ފަރާތްތަކުން ބުނެފައިވެއެވެ.
އެފާޑުކިޔުންތަކަށް ރައްދެއް ދެމުން ޝަޔާޙް މިއަދު އޭނާގެ ފޭސްބުކްގައި ލިޔެފައިވަނީ ކަމުގެ ހަގީގަތް އޮޅުން ނުފިލުވާ، އޭނާ ދާއިރާގެ އަގު ވައްޓާލައިފި ކަމަށްބުނެ ދާއިރާގެ ބައެއް މީހުން ވާހަކަދެއްކުމުން ހިތާމަ ކުރާކަމަށެވެ.
"އެ 3،000 ރުފިޔާއަކީ މިޔުޒިކް ކޮމްޕޯޒަރ އަށް ދިން އެއްޗެއް. އަހަރެން ހެދީ ޑްރޯން ފުޓޭޖާއި ވީޑިއޯގްރަފީ. އަދި އަހަންނަށް ރަނގަޅު މުސާރައެއް ޓޫރިޒަމް މިނިސްޓްރީން ލިބޭ" އެމިނިސްޓްރީގެ މުވައްޒިފެއްގެ ގޮތުގައި ވެސް މަސައްކަތްކުރާ ޝަޔާޙް ބުންޏެވެ.
މީގެއިތުރުން އޭނާ ބުނީ މިދާއިރާގައި އުޅޭތާ ހަތް އަހަރުވެފައިވާ ކަމަށާއި، ދާއިރާއަށް އިޚްތިރާމް ކުރާ ކަމަށެވެ. އެހެންކަމުން ރަނގަޅަށް މައުލޫމާތު ނުހޯދާ އޭނާއާއި އޭނާގެ މަސައްކަތުގެ އަގުވައްޓާ ނުލުމަށް ވެސް ޝަޔާޙް ބުންޏެވެ.
Ads by STO
