މިއަދު ލަންކާއިން ރާއްޖެ އަންނަ 153 މީހަކު ހޯމް ކަރަންޓީނަށް!
މާދަމާ ހެނދުނު ސްރީލަންކާ އިން ރާއްޖެ އަންނަ 262 މީހުންގެ ތެރެއިން 153 މީހަކު ރާއްޖެ އައިސް ދާނީ ހޯމް ކަރަންޓީނަށް ކަމަށް ނެޝަނަލް އެމަޖެންސީ އޮޕަރޭޝަން ސެންޓަރުން ބުނެފިއެވެ.
ރޭ ބޭއްވި ނޫސްވެރިންގެ ބައްދަލުވުމުގައި ކޮވިޑް-19ގެ ތަރުޖަމާނު ވިދާޅުވީ މަބުރޫކް އަޒީޒް ވިދާޅުވީ ސްރީލަންކަން އެއާލައިންސްގެ ފްލައިޓެއްގައި މިއަދު ރާއްޖެ އަންނަ މީހުންގެ ތެރޭގައި ހިމެނެނީ ބޭސްފަރުވާއަށް ގޮސް އަނބުރާ ރާއްޖެ ނާދެވި ތިބި މީހުންނާއި، ފަތުރުވެރިންގެ ގޮތުގައި ލަންކާއަށް ގޮސް ނާދެވި ތިބި މީހުންނާއި، ކިޔަވާ ދަރިވަރުންގެ ތެރެއިން ކޯސް ނިމި، ރާއްޖެ އަށް އަނބުރާ ނާދެވި ތިބި މީހުންގެ އިތުރުން ސިއްހީ ސަބަބުތަކަށްޓަކައި އަނބުރާ އަންނަން ބޭނުންވާ މީހުން އަދި ދިރިއުޅުމުގެ ހާލަތު ހުރި ގޮތުން އެނބުރި އަންނަން ބޭނުންވާ މީހުންނަށެވެ.
އެ މީޙުންގެ ތެރެއިން ގޭގައި ކަރަންޓީންވުމަށް އެދުނު މީހުންނަށް އެ ފުރުސަތު ދޭން ނިންމާފައިވާ ކަމަށް މަބްރޫކް ވިދާޅުވި އޭގެ ތެރެއިން ބައެއް މީހުންނަކީ އެކި ރަށްރަށުގައި ކަރަންޓީންވުމަށް އެދިފައިވާ މީހުންނެވެ. އެގޮތުން 13 އަތޮޅެއްގެ އެކި ރަށްރަށުގައި ކަރަންޓީންވުމަށް އެދިފައިވާ ކަމަށް މަބުރޫކް ވިދާޅުވިއެވެ.
މަބުރޫކް ވިދާޅުވީ ރަށްރަށުގައި ކަރަންޓީވާ މީހުންގެ ދަތުރުފަތުރުގެ ކަންކަން ސިފައިން ހަމަޖައްސާނެ ކަމަށެވެ.
ބޭރުގައުމުތަކުގައި ތިބި ދިވެހިންގެ ތެރެއިން ރާއްޖެ އަންނަ މީހުން، ރާއްޖެ އައުމުގެ ކުރިން ކަރަންޓީނާ ގުޅޭ ފޯމު ފުރިހަމަ ކުރުމަށް މަބްރޫކު ރޭ ވަނީ އިލްތިމާސް ކުރައްވާފައެވެ.
މާލޭ ސިޓީގެ ލޮކްޑައުންއާ ގުޅިގެން ރަށްރަށަށް ނުދެވިފައި ތިބި މީހުން ރަށްރަށުގައި ކަރަންޓީނު ކުރުމުގެ އުސޫލެއްވެސް ވަނީ މިހާރު ހަމަޖައްސާފައެވެ.
