ހުޅުމާލެ މެޑިކަލް ފެސިލިޓީ 7 މީހަކަށް ފަރުވާދޭން ފަށައިފި
ހުޅުމާލޭގައި ހުންނަ ކޮވިޑް-19 އަށް ފަރުވާދޭ ފެސިލިޓީގައި މިހާރު ހަތް މީހަކަށް ފަރުވާދެމުންދާ ކަމަށް ނެޝަނަލް އެމަޖެންސީ އޮޕަރޭޝަން ސެންޓަރުން ބުނެފިއެވެ.
ރޭ ބޭއްވި ނޫސްވެރިންގެ ބައްދަލުވުމުގައި ކޮވިޑްގެ ތަރުޖަމާން މަބްރޫކް އަޒީޒް ވިދާޅުވީ ހުޅުމާލެ މެޑިކަލް ފެސިލިޓީގައި ފަރުވާ ދެމުންދާ ހުރިހާ ބަލި މީހުންގެ ހާލުވެސް ރަނގަޅުކަމަށެވެ.
ސިފައިންނާއި ސަރުކާރުގެ ބައެއް ކުންފުނިތަކާއި އަމިއްލަ ކުންފުނިތައް ގުޅިގެން ހުޅުމާލޭގައި ޤާއިމުކުރި މެޑިކަލް ފެސިލިޓީއަކީ 290 އެނދުގެ ފެސިލިޓީއެކެވެ.
މިދިޔަ އޭޕްރީލް މަހުގެ ފުރަތަމަ ދުވަހު ޤައުމީ ދިފާއީ ބާރުގެ ބެލުމުގެ ދަށުން ތަރައްޤީކުރަން ފެށި ހުޅުމާލޭ މެޑިކަލް ފެސިލިޓީގެ އިމާރާތުގެ މަސައްކަތް ނިންމާ އެތަން އައިޖީއެމްއެޗްއާ ޙަވާލުކޮށްފައިވަނީ މިދިޔަ މަހުގެ 24 ވަނަ ދުވަހުއެވެ. މިތަން ތަރައްޤީކޮށްފައިވަނީ 5 ބުލޮކް ހިމެނޭ ގޮތަށެވެ.
ރާއްޖެ އިން މިހާތަނަށް 1،942 މީހުން ކޮވިޑް-19 އަށް ފައްސި ވެފައި ވާއިރު، މިވަގުތު ބައްޔަށް ފަރުވާ ހޯދަމުން ދަނީ 922 މީހުން ނެވެ. އަދި ރާއްޖެ އިން ކޮވިޑް-19 ޖެހުނު 1،010 މީހަކު ވަނީ މިހާރު ބަލިން ރަނގަޅުވެފަ އެވެ.
