އަނެއްކާވެސް މާބަނޑު އަންހެނެއްގެ ބަނޑަށް ދަރިފުޅު ނިޔާވެއްޖެ
ހއ. ބާރަށުގައި މާބަނޑު އަންހެނެއްގެ ބަނޑަށް ދަރިފުޅު ނިޔާވެއްޖެއެވެ.
މާބަނޑުވި މީހާގެ އާއިލާއާ ހަވާލާދީ "ވަގުތު" ނޫހުގައި ރިޕޯޓު ކޮށްފައިވާ ގޮތުގައި ދަރިފުޅު ނިޔާވިއިރު މާބަނޑު މީހާގެ ބަނޑަށް ހަމަސް ފުރިފައިވާ ކަމަށެވެ.
އައިލާގެ ފަރާތުން އެ ނޫހަށް މައުލޫމާތު ދިން މީހާ ބުނީ ރަށް ރަށަށް އަރައި ފޭބުން މަނާ ކޮށްފައި އޮތުމާ ގުޅިގެން ބާރަށުން ފުރައިގެން އެ އަތޮޅު ހޮސްޕިޓަލު އޮންނަ ދިއްދުއަށް ނުދެވި، މާބަނޑު މީހާ ޑޮކްޓަރަށް ދައްކަން ޖެހޭ ދުވަހަށް ޑޮކްޓަރަށް ނުދެއްކި ދުވަސްތަކެއް ވުމަށްފަހު، ދިއްދޫގައި ހުންނަ އަތޮޅު ހޮސްޕިޓަލަށް ދެވޭ ގޮތްވީ އިއްޔެގެ ވަގުތެއްގައި ކަމަށެވެ.
"ދިއްދު އަށް ދިއުމުން ޑޮކްޓަރު ބަލާފައި މިބުނީ ކުޅުދުއްފުއްޓަށް ދާށޭ ދަރިފުޅުގެ ވިންދެއް ނެތޭ. ކުޅުދުއްފުއްޓަށް ދިއުމުން މިބުނަނީ ދަރިފުޅުގެ ވިންދެއް ނެތޭ، ނިޔާވެފައި އޮތް ކަމަށޭ ބެލެވެނީ. އެޑްމިޓް ކުރަންށޭ ޖެހެނީ. ނަމަވެސް ދެން ފަހުން ބުނެފި ދިއްދުއަށް ދާން. އެހިސާބުން ދެމަފިރިން އައީ ފުރަތަމަ ބާރަށަށް." އާއިލާ އިން މައުލޫމާތު ދިން މީހާ ބުންޏެވެ.
އޭނާ ބުނީ އަނެއްކާ ވެސް ބާރަށުގައި ހުއްޓާ މިއަދު މާބަނޑު މީހާގެ ބަނޑުގައި ރިއްސާތީ އެ ރަށު ހެލްތު ސެންޓަރަށް ދެއްކުމުން ދިއްދުއަށް ދާން ބުނި ކަމަށެވެ. ދިއްދުއަށް ދިއުމުން އަނެއްކާ ދިއްދުއިން މާބަނޑު މީހާ ވަނީ ކުޅުދުއްފުއްޓަށް ފޮނުވާފައި ކަމަށް އެ މީހާ ބުންޏެވެ.
މައުލޫމާތު ދިން މީހާ ބުނީ އާސަންދަ ހަމަ ނުޖެހުމުން އެ ހުރިހާ ދަތުރެއް ކުރަން ޖެހުނީ އަމިއްލަ ހަރަދުގައި ކަމަށެވެ.
