އުމަރުގެ ވެރިކަމެއްގައި މާބަނޑު މީހުންނަށް ކަނޑު ހުރަސްކޮށް ހޮސްޕިޓަލަށް ދަތުރުކުރުން ހިލޭ!
އުމަރު ނަސީރުގެ ވެރިކަމެއްގައި މާބަނޑު މީހުން ކަނޑު ހުރަސްކޮށް ހޮސްޕިޓަލަށް ކުރާ ދަތުރުތައް ހިލޭ ކުރެވޭނެ އިންތިޒާމު ހަމަޖައްސާނެ ކަމަށް އޭނާ ވިދާޅުވެއްޖެއެވެ.
އުމަރު މިހެން ވިދާޅުވީ ދާދިފަހުން ވިހެއުމުގެ ކުރިން ނުވަތަ ވެހެއުމަށް ފަހު ކުޑަ ކުދިންތަކެއް ނިޔާވި ހާދިސާތަކާ ގުޅިގެންނެވެ. އެގޮތުން އިއްޔެ ވެސް ވަނީ ހއ. ބާރަށު އަންހެނެއްގެ ބަނޑަށް އޭނާގެ ދަރިފުޅު ނިޔާވެފައެވެ.
އެގޮތުން އުމަރުގެ ފޭސްބުކް ޕޭޖުގައި ކުރެއްވި ޕޯސްޓެއްގައި ވިދާޅުވީ
މި މައްސަލައަކީ ވަރަށް ހިތާމަކުރަންޖެހޭ ކަމެއް ކަމަށާއި އަތޮޅު ތެރޭގައި ދިރިއުޅޭ މާބަނޑު މީހުން، އެމީހުން ހަދަންޖެހޭ ޓެސްޓްތައް ހެދުމަށާއި އެކިއެކި ހާލަތްތަކުގައި ޑޮކްޓަރަށް ދެއްކުމަށް އަތޮޅު ހޮސްޕިޓަލަށް ނުވަތަ ރީޖަނަލް ހޮސްޕިޓަލަށް ކޮންމެހެން ކުރަންޖެހޭ ދަތުރަކީ ވަރަށް ދަތި އަދި ގިނަފަހަރު އަތްނުފޯރާ ވަރުގެ އަގެއް ދައްކަންޖެހޭ ދަތުރެއް ކަމަށެވެ.
އެގޮތުން މިއީ އާދައިގެ ނިކަމެތި އާއިލާތަކަށް ވަރަށް ބޮޑު ވޭނެއް އިހުސާސްކުރަން ޖެހޭ ދަތުރުތަކެއްކަން އުމަރު ފާހަގަކުރެއްވިއެވެ.
"އަޅުގަނޑުގެ ވެރިކަމެއްގައި، މާބަނޑު މީހުން ކަނޑު ހުރަސްކޮށް، ހޮސްޕިޓަލްތަކަށް ކުރަންޖެހޭ ދަތުރުތައް އިރާދަކުރެއްވިއްޔާ، ހިލޭކޮށްދެވޭނެ އިންތިޒާމް ހަމަޖައްސައިދޭނަމެވެ" އުމަރު ވިދާޅުވިއެވެ.
Ads by STO
