މިއަދު ކޮވިޑަށް ފައްސިވީ 14 މީހުން!
މިއަދު އިތުރު 14 މީހަކު ކޮވިޑް-19 އަށް ފައްސި ވެއްޖެއެވެ.
ހެލްތު ޕްރިޓެކްޝަން އެޖެންސީ(އެޗްޕީއޭ) އިން ބުނީ މި 14 މީހުންގެ ތެރޭގައި ހިމެނެނީ ފަސް ދިވެހިންނާއި ބަންގްލަދޭޝްގެ 8 މީހަކާއި ސްރީ ލަންކާ މީހެއް ކަމަށެވެ.
މި 14 މީހުންނާއެކު ރާއްޖެއިން ފައްސިވި މީހުންގެ ޖުމްލަ އަދަދު މިހާރު ވަނީ 1976 އަށް އަރާފައެވެ. މީގެތެރެއިން ފަރުވާ ދެމުން މިހާރު އަންނަނީ 813 މީހަކަށެވެ. އަދި މިއަދު އިތުރު 32 މީހަކު ބަލިން ރަނގަޅު، ބަލިން ރަނގަޅުވި މީހުންގެ ޖުމްލަ އަދަދު ވަނީ 1153 އަށް އަރާފައެވެ.
މި ބަލީގައި ރާއްޖެއިން 8 މީހަކު ވަނީ ނިޔާވެފައެވެ. އޭގެތެރޭގައި ހިމެނެނީ ބަންގްލަދޭޝްގެ ހަތަރު މީހުންނާއި ހަތަރު ދިވެހިންނެވެ.
ކޮވިޑް-19އާ ގުޅިގެން މާލެ ސަރަހައްދުގައި އިއުލާންކޮށްފައިވާ ލޮކްޑައުންގެ މުއްދަތު، ލުއިތަކާއެކު އިތުރު ތިން ދުވަހަށް އިތުރުކުރަން އެޗްޕީއޭ އިން މިހާރު ވަނީ ނިންމާފައެވެ.
