ނަބީލަށް އަނިޔާކުރި ކަމަށް ބުނާ މައްސަލަ ބަލާނެ ތަނެއް ނެތް: ފުލުހުން
ނަސްރުގެ ދުވަސް ފާހަގަ ކުރުމުގެ ގޮތުން އިދިކޮޅު ކޯލިޝަނުން ބޭއްވި ޖަލްސާގައި ޕީއެންސީގެ ކައުންސިލް މެންބަރު ނަބީލް ޒަމީލަށަ ފުލުހަކު އަނިޔާކޮށްފައިވާ މައްސަލަ ބެލުމަށްފަހު ނަބީލަށް އަނިޔާކުރި ކަމަށް ބުނާ މައްސަލައެއް ބަލާނެ ތަނެއް ނެތް ކަމުގައި ފުލުހުން ނިންމައިފިއެވެ.
މިއަދު ހަވީރު 4:30ގައި ނަބީލް ފުލުހަށް ހާޒިރު ކޮށް މައްސަލަ ނިމުނު ގޮތުގެ ލިޔުން ނަބީލަށް ފުލުހުން ވަނީ ހަވާލު ކޮށްފައެވެ. އެލިޔުމުގައި ބުނެފައިވަނީ 3 ނޮވެމްބަރު 2020، 22:08ހާއިރު ފުލުހުން ނަބީލް ހުއްޓުވައި ހާލަތާ ބައްދަލު ބާރު ބޭނުންކޮށް އަނިޔާކުރިކަމަށް ހުށަހަޅާފައިވާ މައްސަލައިގައި ނަބީލް ފާހަގަ ކޮށްފައިވާ ކަންކަމާއިިި ތަހުގީގަަށް ފާހަގަ ކުރެވުނު ކަންކަމަށް ރިއާޔަތް ކުރާއިރު ނަބީލް ހުއްޓުވުމުގައި ހާލަތާ ނުބައްދަލު ބާރު ބޭނުންކޮށް އަނިޔާވެރި އަމަލެއް ހިންގި ކަމަށް ބަލާނެ ތަނެއް އޮތް ކަމަށް ނުފެންނަ ކަމުގައެވެ.
މީގެ އިތުރުން މި ލިޔުމުގައި ބުނެފައިވަނީ ފުލުހުންގެ އެއްވެސް މުވައްޒަފަކާމެދު ފިޔަވަޅު އަޅާނެ ތަނެއް ވެސް ނެތް ކަމަށް ނިންމާ މައްސަލަ ފުލުހުން ފައިލް ކޮށްފައިވާ ކަމަށެވެ.
މިކަމާ ގުޅިގެން "ދެން"އާ ވާހަކަ ދައްކަވަމުން ނަބީލްގެ ގާނޫނީ ވަކީލް އާސިފް ވިދާޅުވީ އަނގަބަހުން ވާހަކަދައްކަމުން ނުރަސްމީ ގޮތެއްގައި ފުލުހުން ވަނީ އެ މައްސަލަ މިހާރު ވެސް ބަލަމުން ދާ ކަމަށް ބުނެފައި ކަމަށެވެ. އަދި މީގެ އިތުރުން ނަބީލަށް އަނިޔާކުރި ކަމަށް ތުހުމަތު ކުރެވޭ ފުލުސް އޮފިސަރު ހާޒިރު ކުރެވި ބަޔާން ނަގައި ނަސޭހަތް ވެސް ދެވިފައިވާ ކަމުގައި ފުލުހުން އަނގަބަހުން ބުނި ކަމުގައި އާސިފް ފާހަގަ ކުރިއެވެ.
މީގެ އިތުރުން އާސިފް ފާހަގަ ކުރީ މި މައްސަލައިގެ ތަހުގީގަށް ނަބީލް ފުލުހަށް ހާޒިރު ކޮށްފައިނުވާ ކަމާއި ބަޔާނެއް ވެސް ނަގާފައި ނުވާ ކަމަށެެވެ. ނަބީލަށް އަނިޔާކުރި ކަމަށް ތުހުމަތު ކުރެވޭ ފުލުހަކީ ރައީސް އިބްރާހިމް މުހައްމަދު ޞާލިހްގެ އާއިލީ މީހެއް ކަމަށެވެ. އަދި "ރޯޔަލް" ފެމިލީގެ މީހެއްގެ މައްސަލައަކަށް ވާތީ ނަބީލަށް އިންސާފު ނުލިބުނީ ކަމުގައި އާސިފް ސިފަކުރެއެވެ.
