ރައީސް ވަހީދަށް ކުރި ފުރައްސާރަ އެމްޑީޕީ އިން ދިފާއުކޮށްފި
ކުރީގެ ރައީސް ޑރ. މުހައްމަދު ވަހީދު ހަސަން މަނިކުގެ ދެކަނބަލުން މިއަދު މާލޭ އުސްފަސްގަނޑުގައި އުޅުއްވަނިކޮށް އެމްޑީޕީ އެކްޓިވިސްޓަކު ފުރައްސާރަ ކުރި މައްސަލަ ފުލުހުން ތަހުގީގު ކުރަން ފެށުމުން އޭނާ ގެ ދިފާއު ގައި އެމްޑީޕީގެ އިސް ބޭފުޅުންނާއި އެކްޓިވިސްޓުން ތެދުވެއްޖެ އެވެ.
ރައީސް ވަހީދު ކުރެއްވި ޓުވީޓެއްގައި ވިދާޅުވީ މިއަދު ހެނދުނު އެމަނިކުފާނާއި އަނބިކަނބަލުން އިލްހާމަށް އެމްޑީޕީ އެކްޓިވިސްޓެއް ކަމަށްވާ ޖޯރޭ ހަމަލާ ދީފައިވާ ކަމަށެވެ. އަދި އެކަން ކުށްވެރި ކުރައްވާ ކަމަށެވެ. ވިދާޅުވީ އެ ހުތުރު އަމަލަށް މިއަދު ހެނދުނު މާލޭގެ އުސްފަސްގަނޑު ސަރަހައްދުގައި ކަސްރަތު ކުރަން ތިބި މީހުން ހެކިވާނެ ކަމަށެވެ.
އެމްޑީޕީގެ ގިނަ އެކްޓިވިސްޓުން ވަނީ ސޯޝަލް މީޑިއާގައި އެއީ މާ ބޮޑު މައްސަލައެއް ނޫން ކަމަށް ސިފަވާ ގޮތަށް ވާހަކަ ދައްކާ ވަރަށް ބޮޑަށް ރައީސް ވަހީދާ ދެކޮޅަށް ނުރުހުން ފާޅުކޮށްފަ އެވެ. އަދި އެމްޑީޕީގެ އިސް ބައެއް ބޭފުޅުންނާއި އެމްޑީޕީގެ މަޖިލީސް މެންބަރުން ވެސް ވަނީ ވަހީދަށް ފުރައްސާރަކުރި މީހާއަށް ހިތްވަރުދީ ވާހަކަ ދަައްކާފަ އެވެ.
އެގޮތުން މި ހަމަލާ ކުއްވެރިކޮށް ޔޫތު މިނިސްޓަރު އަހުމަދު މަހުލޫފު ކުރެއްވި ޓްވީޓަކަށް ރައްދު ދެއްވާ މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ ވަނީ އަނގަބަހުން އެއްޗެއް ރައްދު ކުރުން ހަމަލާއަކަށް ވަނީ ކިހިނެތްތޯ ސުވާލު ކުރައްވާ ރައީސް ވަހީދުގެ ފަރާތުން ޖިސްމާނީ އަނިޔާ އާއި ގެއްލުން އިންތިހާއަށް ލިބުުނު ރައްޔިތުންގެ ތެރެއިން މީހަކަށް އެވަރު ވެސް ނުކޮށްލެވޭނެތޯ ސުވާލު އުފައްދާފައެވެ.
މީގެ އިތުރުން ގަލޮޅު ދެކުނު ދާއިރާގެ މެންބަރު މީކާއީލް ނަސީމް އާއި ފޮނަދޫ ދާއިރާގެ މެންބަރު މޫސާ ސިރާޖް ވެސް ވަނީ ފުރައްސާރަ ކުރި މީހާ ދިފާއުކޮށް ވާހަކަދައްކަވާފައެވެ.
މިކަމާ ގުޅިގެން ފުލުހުން ބުނީ، ރައީސް ވަހީދު ފަތާ ޓްރެކް ސަރަހައްދުގައި އުޅުއްވަނިކޮށް އެމަނިކުފާނަށް ހަޑި ހުތުރު ބަހުން އެއްޗެހި ކިޔާ ފުރައްސާރަ ކުރި މައްސަލައެއް މިއަދު ހެނދުނު 7:07 ހާއިރު ފުލުހުންނަށް ރިޕޯޓްކޮށްފައިވާ ކަމަށެވެ.
މި ހާދިސާ އާ ގުޅިގެން ރައީސް ވަހީދަށް ރައީސް ސޯލިހު ވަނީ މިއަދު ފޯނުން ގުޅުއްވާ ހާލު ބައްލަވާފަ އެވެ.
