މަޖިލީހުގެ ރައީސް އަދި މެންބަރުން، ޤާނޫންތައް މުގުރާލާ މީހުންނަށް ފުރައްސާރަ ކުރަން ހިތްވަރުދޭތީ ހިތާމަ ކުރަން- ޑރ ވަޙީދު
މިއަދު ރައްޔިތުންގެ މަޖިލީހުގައި ކުރިޔަށްދިޔަނީ ބޭކާރު ބަހުސެއް ކަަމަށް ކުރީގެ ރައީސް ޑރ.މުޙައްމަދު ވަޙީދު ހަސަން މަނިކު ވިދާޅުވެއްޖެއެވެ.
އިއްޔެ ހެނދުނު އުސްފަސްގަނޑު ސަރަހައްދަށް ކަސްރަތު ކުރެއްވުމަށް ނުކުމެވަޑައިގެން އުޅުއްވަނިކޮށް އެމްޑީޕީގެ ސަޕޯޓަރަކު، އެމަނިކުފާނަށް ފުރައްސާރަ ކުރުމާ ގުޅިގެން، މަޖިލީހުގައި މިއަދު އެމްޑީޕީގެ ގިނަ މެންބަރުން އެކަން ދިފާޢުކުރައްވާ ވާހަކަފުޅު ދައްކަވާފައިވަނިކޮށް، ރައީސް ވަޙީދު ދާދިދެންމެއަކު ކުރައްވި ޓްވީޓެއްގައި ވިދާޅުވީ، އެމަނިކުފާނާ ދިމާއަށް އެމްޑީޕީގެ އެކްޓިވިސްޓް ގޮވީ ބާޣީއަކަށް ނޫން ކަމަށާއި، މުޢާމަލާތް ކުރީ ހަޑިހުތުރު ގޮތައް ކަަމަށެވެ.
މިގޮތުން އޭނާ ގޮވާފައިވަނީ 'ހަރާމް ބަކަރި، ޤައުމު ބަޑު އަޅާލި ވަގު' މިފަދަ އެއްޗެހި ކަމަށާއި އަދި އެކަނިކުފާނަށް މީހަކު ފުރައްސާރަ ކުރުމުން އެމައްސަލަ ފުލުހުންނަށް ހުށަހަޅާފައުނުވާ ކަމަށެވެ. މިޓްވީޓްގައި ވަޙީދު އިތުރަށް ވިދާޅުވީ، މަޖިލީހުގެ ރައީސް އަދި މެންބަރުން، ޤާނޫންތައް މުގުރާލާ މީހުންނަށް ފުރައްސާރަ ކުރަން ހިތްވަރުދޭތީ ހިތާމަ ކުރާ ކަމަށެވެ.
ރައީސް ނަޝީދާއި، އެމްޑީޕީ އަށް ނިސްބަތްވާ ރައްޔިތުން މަޖިލީހުގެ މެންބަރުން ގެންދަނީ ރައީސް ވަހީދަށް އެމްޑީޕި އެކްޓިވިސްޓް ކުރި ފުރައްސާރަ ދިފާއު ކުރަމުންނެވެ. އެމްޑީޕީގެ ބައެއް މެންބަރުން ވަނީ ރައީސް ވަހީދަށް އިތުރަށް ފުރައްސާރަ ކުރުމަށް ވެސް މިއަދު މަޖިލިސް ޖަލްސާގައި ގޮވާލާފައެވެ.
