ޖީހާނަށް ގަމުން ގޯތި ދިނުމުގައި ޕޮއިންޓް ދިނީ ރަނގަޅަށް: ކައުންސިލް
ލ. ގަމުން ގޯތި ހޯދުމަށް އެދި، ރައްޔިތުންގެ މަޖިލީހުގެ ހިންނަވަރު ދާއިރާގެ މެމްބަރު ޖީހާން މަހްމޫދު ހުށަހެޅުއްވި ފޯމަށް ޕޮއިންޓް ދީފައި ވާނީ ރަނގަޅަށް ކަމަށް، ގަން ކައުންސިލުން ބުނެފި އެވެ.
ގަމު ކައުންސިލުން ނެރުނު ބަޔާނުގައި ބުނީ، އެ ބަޔާނަކީ ޖީހާނަށް ޕޮއިންޓް ދީފައިވާ ގޮތާ މެދު ދެކެވެމުންދާ ހަގީގަތާ ހިލާފް ވާހަކަތައް ސާފުކޮށް ދިނުމަށް ނެރުނު ބަޔާނެއް ކަމަށެވެ. އެ ގޮތުން ޖީހާނަށް ޕޮއިންޓް ދީފައި ވަނީ ރަނގަޅަށް ކަމަށް ކައުންސިލުން ބުނެއެވެ.
ޖީހާންގެ ފޯމު އިވެލުއޭޓް ކުރުމަށްފަހު، ޕޮއިންޓް ދިނުމުގައި ބަލާފައިވާ ކަންތައްތަކުގެ ތެރެއިން ގަމުގައި ދިރިއުޅޭ މީހުންނަށް ދިނުމަށް ކަނޑައަޅާފައިވާ 10 ޕޮއިންޓް ދިނުމުގައި އަމަލުކޮށްފައިވާނީ އެ ކައުންސިލްގެ ގޯތި އިވެލުއޭޓް ކުރާ ކޮމިޓީން ކަނޑައަޅާފައިވާ މިންގަނޑަށް ކަމަށެވެ.
އެ މިންގަނޑު ކަމުގައި ކައުންސިލުން ބުނެފައި ވަނީ، ރަށުން ބޭރު މީހެއް ނަމަވެސް، ގޯއްޗަށް އެދުނު މީހާ ރަށުގެ ރަށްވެއްސަކާ ކައިވެނިކޮށްގެން އުޅުމާއި ދެމަފިރިންގެ ދަރިން ގަމުގައި ރަށްވެހިވެފައިވުމެވެ.
މިފަދަ މީހުން ރަށުން ބޭރުގައި ދިރިއުޅުނަސް ގަމުގައި ދިރިއުޅޭ މީހުންނަށް ދިނުމަށް ކަނޑައެޅިފައިވާ 10 ޕޮއިންޓް ދިނުމަށް އެ މިންގަނޑުގައިވާ ކަމަށް ކައުންސިލުން ބުނެއެވެ.
އެހެންކަމުން ޖީހާނަށް ޕޮއިންޓް ދިނުމުގައި ވެސް ބަލާފައިވާނީ އެ އުސޫލަށް ކަމަށް ކައުންސިލުން ބުނެއެވެ.
ޖީހާނަށް ގަމުން ގޯއްޗެއް ލިބިވަޑައިގެންނެވި އިރު، ޖީހާންގެ ފިރިކަލުންނަކީ ގަމު ރަށްވެއްސެކެވެ. އަދި ދެމަފިރިންްގެ ދެކުދިންގެ ރަޖިސްޓްރީ ވެސް އޮތީ ގަމުގަ އެވެ.
ޖީހާންއަށް ލިބިވަޑައިިގެންފައި ވަނީ 71 ޕޮއިންޓެވެ. ޖީހާން ވިދާޅުވީ ފޯމު ހުށަހެޅުއްވި އިރުވެސް، ގޯއްޗަށް ޝަރުތު ހަމަވާ ވަރަށް ޕޮއިންޓް ލިބޭނެކަން އެނގިވަޑައިގަންނަވާ ކަމަށެވެ. ޖީހާން ވަނީ ގަމުން ގޯތި ހޯދުމުގައި އެއްވެސް ނުފޫޒެއް ފޯރުވާފައިނުވާނެ ކަމުގެ ޔަގީންކަން ދެއްވައިފަ އެވެ.
Ads by STO
