ކޮވިޑް ޖެހުނު މީހުންގެ ތެރެއިން 74 ޕަސެންޓު މީހުން ރަނގަޅު ވެއްޖެ
ރާއްޖެއިން ކޮވިޑް-19 އަށް ފައްސިވި މީހުންގެ ތެރެއިން 74.5 ޕަސެންޓު މީހުން ރަނގަޅު ވެއްޖެއެވެ.
ހެލްތު ޕްރޮޓެކްޝަން އެޖެންސީ(އެޗްޕީއޭ) އިން މިރޭ އާންމުކުރި ތަފާސްހިސާބުތައް ދައްކާގޮތުން ރާއްޖެއިން މިހާތަނަށް 2065 މީހަކަށް ވަނީ ކޮވިޑް ޖެހިފައެވެ. އަދި އޭގެ ތެރެއިން 1540 މީހުން ރަނގަޅުވެފައިވާއިރު، އެއީ ބަލި ޖެހުނު މީހުންގެ 74.57 ޕަސެންޓެވެ.
ބަލި ޖެހުނު މީހުންގެ ތެރެއިން މިއަދު ރަނގަޅުވީ 229 މީހުންނެވެ. މިއީ މިފަހުން އެންމެ ގިނަ ބަޔަކު ރަނގަޅުވީ ދުވަހެވެ.
މިވަގުތު ކޮވިޑަށް ފަރުވާ ކުރަމުންދަނީ 515 މީހުންނެވެ. އޭގެ ތެރެއިން ނުވަ މީހުންނަށް ފަރުވާ ދެނީ ހޮސްޕިޓަލްގައެވެ.
މިއަދުގެ މިހާތަނަށް ކޮވިޑް-19 އަށް ފައްސިވެފައި ވަނީ 30 މީހުންނެވެ. އެޗްޕީއޭއިން މިރޭ ބުނީ ކޮވިޑަށް ފައްސިވި 30 މީހުންގެ ތެރޭގައި ހިމެނެނީ 16 ދިވެހިންނާއި ބަންގްލަދޭޝްގެ 13 މީހެއްގެ އިތުރުން ނޭޕާލް މީހެކެވެ.
މިވަގުތު ކަރަންޓީންގައި ތިބީ 356 މީހުންނެވެ. އައިސޮލޭޝަންގައި ތިބީ 362 މީހުންނެވެ.
Ads by STO
