"އެމްޑީޕީ ވެރިކަމަށް އަންނަ ކޮންމެ ފަހަރަކު ފުލުހުންގެ އަގު ވައްޓާލަން ކުރާ މަސައްކަތް ބަލައެއް ނުގަނެވޭނެ"
އެމްޑީޕީ ވެރިކަމަށް އަންނަ ކޮންމެ ފަހަރަކު ފުލުހުންގެ އަގު ވައްޓާލަން ކުރާ މަސައްކަތް ބަލައެއް ނުގަނެވޭނެ އިދިކޮޅު ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.
އަދުރޭ މިހެންމި ވިދާޅުވީ ފުލުހުންގެ ތައުލީމީ ފެންވަރާ، ގާބިލުކަމާމެދު ސުވާލުއުފައްދާ، ފުލުހުންގެ މުއައްސަސާއަށް މަޖިލީހުގެ ތަޅުމުގައި އެމްޑީޕީ މެމްބަރުން އިއްޔެ ފާޑު ވިދާޅުވުމާ ގުޅިގެންނެވެ.
މިކަމާ ގުޅިގެން އަދުރޭ ކުރެއްވި ޓްވީޓެއްގައި ވިދާޅުވީ އެމްޑީޕީ ވެރިކަމަށް އަންނަ ކޮންމެ ފަހަރަކު ދިވެހި ފުލުހުންނަށް މަލާމާތްކޮށް، ބިރު ދައްކާ ހަގީގަތެއް ނެތް އިލްޒާމްތައް އަޅުވާ އަގު ވައްޓާލުމަކީ ބަލައިގަނެވޭނެ ކަމެއް ނޫން ކަމަށެވެ.
"ފުލުހުންގެ ހިދުމަތަކީ އަގު ކުރެވޭ ވަރަށް ވުރެ މާ މަތިވެރި ހިދުމަތެއް. ދިވެހި ފުލުހުންނަށްޓަކައި ފަހުރުވެރިވަން." އަދުރޭ ވިދާޅުވިއެވެ.
ރައްޔިތުންގެ މަޖިލީހަށް ސަރުކާރުން ހުށަހަޅާފައިވާ ދިވެހި ފުލުހުންގެ ހިދުމަތުގެ ބިލަށް ބަހުސްކުރައްވަމުން، ގިނަ އެމްޑީޕީ މެމްބަރުން އަންނަނީ ފުލުހުންގެ ތެރޭގައި ކުށްކުރާ ފުލުހުން އުޅޭ ކަމަށާއި، އަދި ފުލުހުންގެ މައްސަލަތައް އެކަށީގެންވާ ގޮތެއްގައި ނުބެލޭ ކަމަށް ވިދާޅުވަމުންނެވެ. އަދި ފުލުހުންގެ ތެރޭގައި ތައުލީމީ ފެންވަރު ދަށް، ގާބިލު ނޫން އޮފިސަރުން ތިބި ކަމަށް ވެސް މެމްބަރުން އަންނަނީ ވިދާޅުވަމުންނެވެ.
ފުލުހުންގެ މުޅި މުއައްސަސާގެ އަގު ވެއްޓޭގޮތަށް، ބައެއް ފަރާތްތަކުން ތަކުރާރުކޮށް ވާހަކަދައްކަމުން ގެންދާތީ، އެކަމާމެދު ކޮމިޝަނާ އޮފް ޕޮލިސް، މުހައްމަދު ހަމީދު އާއި އެސިސްޓެންޓް ކޮމިޝަނާ އޮފް ޕޮލިސް ޑރ. އަބްދުﷲ ފައިރޫޝް ވެސް އިއްޔެ ވަނީ ކަންބޮޑުވުން ފާޅުކުރައްވައިފަ އެވެ.
