ފުލުހުންގެ ތެރޭގައި މަސައްކަތް ކުރައްވާ ބައެއް ފުލުހުންގެ ނަޒަރުގައި އެބޭފުޅުންނަކީ މުޅި "ފުލުހުންގެ އިދާރާ" ކަމަށް ރައްޔިތުންގެ މަޖިލިހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
Ads by Sosun Fihaara
ކުރީގެ ޖަލްސާތަކުގައި ފުލުހުންގެ ބިލަށް ބަހުސް ކުރައްވަމުން އެމްޑީޕީގެ މެމްބަރުން ވަނީ ފުލުހުންނަށް ވަރަށް ބޮޑަށް ފާޑު ކިޔާ ބާރުތައް ނުދިނުމަށް ގޮވާލައިފަ އެވެ. އަދި ފުލުހުން ފެބްރުއަރީ 8، 2012 ގައި އެމްޑީޕީގެ މެމްބަރަކަށް އަނިޔާ ކުރާ ވީޑިއޯއެއް ވެސް މަޖިލީހުގެ ތަޅުމުގައި އެޅުވި އެވެ. އޭގެ އިތުރުން ފުލުހުންނަށް ޓޭޒާ ގަން ދިނުން ކުށްވެރިކޮށް އެކަމާ ގުޅޭ ގޮތުން ވެސް މަޖިލީހުގައި ދަނީ ހޫނު ބަހުސެއް ކުރަމުންނެވެ.
މިކަމާ ގުޅިގެން ބައެއް ފުލުހުންނާއި ކުރީގައި ފުލުހުންގެ އިސް މަގާމުތައް އަދާކުރެއްވި ފަރާތްތަކުން އަންނަނީ މީސް މީޑިއާގައި އެ ބޭފުޅުންގެ ހިޔާލުފާޅުކޮށް މަޖިލިސް މެމްބަރުންނަށް ބަހުގެ ހަމަލާތައް ދެމުންނެވެ.
މިއަދު ރައްޔިތުންގެ މަޖިލިހުގެ ޖަލްސާ ފައްޓަވައި ދެއްވަމުން ނަޝީދު ވިދާޅުވީ ފުލުހުންގެ މުއައްސަސާއަކީ އެބޭފުޅަކާ ޒާތީ ގޮތުން ތަނެއްގެ ގޮތުގައި ދެކިގެން ހިޔާލު ފާޅުކުރަމުންދާ ކަމަށެވެ.
ނަޝީދު ވިދާޅުވީ ރާއްޖޭގެ ބާރުވެރިކަން ހިންގަމުން އައި ގޮތް، ހަގީގަތުގައި އާ ގާނޫނުއަސާސީއާ އެކީގައި ބަދަލު ކުރުމަކީ ކުރެވިފައި އޮތީ އުންމީދެއް ކަމަށާއި އެކަން ހަގީގަތަކަށް ވެގެން ދިއުމަށް ރައްޔިތުންގެ ހިތްތައް ސާފުވުމަށް ފުލުހުންގެ މުއަސަސާއަށް ބަދަލުތަކެއް ގެންނަން ޖެހޭ ކަމަށެވެ.
ނަޝީދު ވިދާޅުވީ ބިލާ ބެހޭ ގޮތުން ފުރިހަމަ ބަހުސަކަށް ދާން ޖެހޭ ކަމަށެވެ. އަދި ބަހުސްތައް ކުރިއަށް ގެންދަންވާނީ ރައްޔިތުން ފުރިހަމަ އަށް ޝާމިލްވާ ގޮތަށް ކަމަށް ވެސް ނަޝީދު ވިދާޅުވިއެވެ.
ފުލުހުންގެ ހިދުމަތުގެ ބިލު މަޖިލީހަށް މިއަދު ބަލައިގަތުމަށްފަހު ވަނީ މަޖިލީހުގެ ސަލާމަތީ ހިދުމަތްތަކާބެހޭ ކޮމެޓީއަށް ފޮނުވާފައެވެ. މި ބިލު މަޖިލީހަށް ހުށަހަޅާފައިވަނީ ހެންވޭރު ހުޅަނދު ދާއިރާގެ މެމްބަރު ހަސަން ލަތީފު އެވެ.
އެ ބިލުގައި ވަނީ ފުލުހުންގެ ހިދުމަތާ ގުޅޭ ކަންކަމުގައި ހޯމް މިނިސްޓަރުގެ ޒިންމާތަކާއި މަސްއޫލިއްޔަތުތަށް މިހާރުގެ ފުލުހުންގެ ގާނޫނުގައިވާ ވަރަށްވުރެ ސާފުކޮށް ބަޔާންކޮށްފައެވެ. އެ ގޮތުން ވަކިވަކި ފުލުހުންނަށް މިނިސްޓަރަށް އަމުރު ނުކުރެވޭނެ ކަމުގައި ބިލްގައި ކަނޑައަޅާފައިވެއެވެ.
އަދި މި ބިލުގައި ކޮމިޝަނަރ އޮފް ޕޮލިސް އަދި ޑެޕިއުޓީ ކޮމިޝަނަރު އޮފް ޕޮލިސްގެ މަގާމަށް މީހުން ޢައްޔަންކުރުމުގެ އިޖުރާއަތު އިތުރަށް ހަރުދަނާކޮށް، މަގާމުގެ ޝަރުޠުތައް ކަނޑައަޅާފައިވެއެވެ. އަދި ޤާނޫނުއަސާސީއާއި ޤާނޫނުގެ ދާއިރާގެ ތެރޭގައި ފުލުހުންގެ ޚިދުމަތް ހިންގުމަށް ކޮމިޝަނަރަށް ދޭންޖެހޭ މަޝްވަރާއާއި ލަފާ ދިނުމަށާއި، އެކަންކަން އެގޮތަށް ހިނގަމުންދާކަން ކަށަވަރުކުރުމަށްޓަކައި، ކޮމިޝަނަރަށް ލަފާދޭ ބަޔަކު ތިބެންވާނެ ކަމަށް ވެސް ކަނޑައަޅާފައިވެއެވެ.
މީގެއިތުރުން ގާނޫނާ ހިލާފު އަމުރަށް ތަބާވާ ފުލުހުން އެއް އަހަރަށް ޖަލަށްލެވޭ ގޮތް ހެދުމަށް ވެސް ބިލުގައި ހިމަނާފައިވެއެވެ.
