"ހިލޭ ލިބުނު ޓެސްޓު މެޝިނުތައް ރަށްރަށުގައި ނުބެހެއްޓި ލަސްވަނީ މިނިސްޓަރު ހުއްދަ ނުދެއްވައިގެން"
ހެލްތު މިނިސްޓްރީއަށް ބަޔަކު ހަދިޔާކޮށްފައިވާ ލެބޯޓަރީ ޓެސްޓިން މެޝިނުތަކެއް ރަށްރަށުގައި ނުބެހެއްޓިި ލަސްވަނީ ހެލްތު މިނިސްޓަރު ޢަބްދުﷲ އަމީން ހުއްދަނުދެއްވައިގެން ކަމަށް ވިލިފުށީ ދާއިރާ މެމްބަރު ޙަސަން ޢަފީފު ވިދާޅުވެއްޖެއެވެ.
މިއަދު ޖަލްސާގެ ބަހުސްގައި ވާހަކަދައްކަވަމުން އަފީފު ވިދާޅުވީ ބަޔަކު ހަދިޔާކުރި ހަ ޓެސްޓު މެޝިނު ރާއްޖޭގައި ހުންނަތާ މިހާރު ދޮޅުއަހަރު ދުވަސްވެފައިވާ ކަމަށާއި އެމެޝިނު ނުބެހެއްޓިގެން އުޅެނީ މިނިސްޓަރު ހުއްދަނުދެއްވައިގެން ކަމަށެވެ.
"މިނިސްޓަރު ހުއްދައެއް ނުދެއްވައިގެން މެޝިނުތައް ނުބެހެއްޓިފައި. އެހެންވީމައި މިމިނިސްޓަރުގެ ކަންތައް ހުރި ގޮތް މިތަނުން އެބަޖެހޭ ބަލަން" ޢަފީފު ވިދާޅުވިއެވެ.
އަފީފު ވިދާޅުވީ އޭނާ އެހާގިނައިން މިނިސްޓަރު އަމީނަށް ފާޑުކިޔަނީ މިނިސްޓަރުގެ ކަންކަން ހުންނަ ގޮތުން ކަމަށެވެ. މިނިސްޓަރު އިތުބާރުކުރައްވާ ބައެއް ފަރާތްތަކަށް މެޝިނުތައް ގެންނަން ހަވާލުކުރައްވާފައިވާ ކަމަށާއި އަދިވެސް އެމެޝިނުތައް ނުލިބޭ ކަމުގައިވެސް ޢަފީފު ވިދާޅުވިއެވެ. އަދި އައު މުއްދަތުތަކެއް މިހާރު ދެއްވަމުން ދާ ކަމުގައިވެސް ފާހަގަކުރައްވާ ކަމުގައި ޢަފީފު ވިދާޅުވިއެވެ.
ހަސަން ޢަފީފަކީ މީގެ ކުރިންވެސް ހެލްތު މިނިސްޓަރަށް ބޮޑަށް ފާޑުވިދާޅުވެފައިވާ މެމްބަރެކެވެ. އެގޮތުން މިނިސްޓަރު އަމީން ގެންދަވަނީ ސަރުކާރަށް ޖެއްސުން ކުރައްވަމުން ކަމަށާއި މި ސަރުކާރުގެ މިނިސްޓަރެއް ކަމުގައިވީ ނަމަވެސް ކަމެއް ގޯސްކޮށްކޮށްފިނަމަ އެއީ ގޯސްކަމެއްގެ ގޮތުގައި ބަލަންޖެހޭނެ ކަމަށާއި އަދި އެ ވާހަކަ ދައްކަންވެސް ޖެހޭނެ ކަމަށެވެ.
