އަދުރޭގެ މައްޗަށް ދައުވާ އުފުލުމުން ސަރުކާރުގެ ފިނޑިކަން ހާމަވެއްޖެ: ޝުޖާއު
އިދިކޮޅު ޕީއެންސީ ގެ ލީޑަރު އަދި ޕްރޮގްރެސިވް ކޯލިޝަން ހިންގުމާ މިވަގުތު ހަވާލުވެ ހުންނެވި ޢަބްދުއްރަޙީމް ޢަބްދުﷲ (އަދުރޭ) ގެ މައްޗަށް ދައުވާ އުފުލުމުން، މިސަރުކާރުގެ ފިނޑިކަން ހާމަވެއްޖެ ކަމަށް ޕީއެންސީގެ ނައިބު ލީޑަރު އިބްރާހިމް ޝުޖާޢު ވިދާޅުވެެއްޖެއެވެ.
ކްރިމިނަލް ކޯޓު ކައިރި އަށް އިދިކޮޅު ސަޕޯޓަރުން އެއްވި ދުވަހެއްގައި ކޯޓު ސަރަޙައްދުގައި ބޭއަދަބީ ބަސްތައް ބޭނުން ކުރި ކަމަށް ތުހުމަތުކޮށް، މިއަދު ހެނދުނު 9:00 ޖެހިއިރު ކްރިމިނަލް ކޯޓުގައި ވަނީ މިމައްސަލައިގެ ފުރަތަމަ އަޑުއެހުން ބާއްވާފައެވެ.
މި މައްސަލައިގައި އަދުރޭގެ މައްޗަށް ދައުވާ ކުރުމަށް ޕްރޮސެކިއުޓަ ޖެނެރަލް އޮފީހުން ކްރިމިނަލް ކޯޓަށް ފޮނުވާފައި ވަނީ މިދިޔަ އަހަރުގެ އޮކްޓޯބަރު މަހުގެ 26 ވަނަ ދުވަހުއެވެ.
މިކަމާ ގުޅޭގޮތުން ޝުޖާޢު މިއަދު ކުރެއްވި ޓްވީޓެއްގައި ވިދާޅުވީ އަދުރޭގެ މައްޗަށް ދައުވާ އުފުލުމުން މިސަރުކާރުގެ "އަސްލު ސޫރަ" ސާފު ވެއްޖެ ކަމަށެވެ.
"ސަރުކާރުގެ ފިޑިކަން ހާމަވެއްޖެ. ވާދަވެރި ސިޔާސީ ހަރަކާތެއް އޮތުމަށް ނޭދޭކަން ހާމަވެއްޖެ. ސަރުކާރު އޮތީ ފިޓަށް ގޮސްފަކަން ހާމަ ވެއްޖެ." ޝުޖާޢު ވިދާޅުވިއެވެ.
ޝުޖާޢު ވިދާޅުވީ ޕީއެންސީގެ ރައީސް އަދުރޭ އަކީ ހިތްވަރުގަދަ ލީޑަރެއް ކަމަށެވެ.
އަދުރޭގެ މައްޗަށް ދައުވާ އުފުލީ ގާނޫނުލްއުގޫބާތުގެ 615 ވަނަ މާއްދާގެ ދަށުން ހަޑިހުތުރު އެއްޗެހި ކިއުމާއި ހަޑިހުތުރު ބަސް ބޭނުން ކުރުމުގެ ދައުވާއެވެ. މި ކުށް ސާބިތު ވެއްޖެނަމަ، އެންމެ ބޮޑު އަދަބަކީ ތިން މަސް ދުވަހަށް ޖަލަށް ލުމެވެ.
Ads by STO
