މަރުތަކަށް އިންސާފު ހޯދައިދިނުމާއި ދައުލަތުގެ މުދާ އަނބުރާ ހޯދުމުގެ ވަޢުދު: ނަތީޖާ ސުމެއް
އަނިޔާވެރި ގޮތުގައި މަރާލާފައިވާ މީހުންނާއި ގެއްލުވާލާފައިވާ މީހުނަށް އިންސާފު ހޯދައިދިނުމަކީ ރައީސް ޞާލިޙުގެ ރިޔާސީ ވައުދެކެވެ. ހަމަ އެހެންވެ ދައުލަތުގެ މުދަލާއި ފައިސާއަށް ވެފައިވާ ޚިޔާނާތްތަކުގެ ހަޤީޤަތް ހޯދާ ގެއްލިފައިވާ ފައިސާތައް އަނބުރާ ހޯދާ ކުށްވެރިވާ މީހުނަށް ހައްޤު އަދަބު ދިނުމަކީވެސް އެފަދަ އަނެއް ވަޢުދެވެ. ޑރ.އަފްރަޝީމް މަރާއި ނޫސްވެރިޔާ ރިޟްވާން ގެއްލުވާ ލާފައިވާގޮތް ހޯދުމަކީ އެންމެ ބާރަށް ރިޔާސީ އިންތިޚާބުގެ ކެމްޕެއިންގައި ދެއްކި އެއްވާހަކައެވެ.
ރައީސްކަމުގެ ހުވާ ކުރެއްވިތާ 48ގަޑިއިރު ވެސް ނުވަނީސް މަރުކޮމިޝަނަކާއި އެސެޓްރިކަވަރީ ކަމިޝަނެއް ރިޔާސީ ޤަރާރަކުން އުފެއްދެވިއެވެ. މައްސަލަތަކުގެ އެންމެ ފުނަށް ވާސިލުވުމަށް އެންމެ ކުރުމަގަކީ އެއީކަމަށް ގިނަބަޔަކު ގަބޫލުކޮށް ހަމަޖެހުމުގެ ނޭވާައެއް ލެވުނެވެ. ޤާނޫނީ ބާރުލިބިގެން ހިނގަމުން އައި ތަހުޤީޤީ އިދާރާތައް އެހަޤީޤަތް ހޯދުމުގައި ނުކުޅެދިފައިވާ ކަމަށް ގަބޫލު ކުރެވޭތީ ރައީސްގެ އެނިންމެވުމަށް ގިނަބަޔަކު މަރުހަބާ ކިޔެވެ.
ކަމިޝަނުގެ މަސައްކަތް ފެށިކަން އެނގުނެވެ. ކޮމިޝަނުން ބޭނުންވާ ހަލުވި މިނުގައި އިންސާފުވެރިކަން މަސައްކަތް ކުރިޔަށް ގެންދިޔުމުގައި ބޮޑެތި ހުރަސް ތަކެއް ފެންމަތިވިއެވެ. ޤާނޫނީގޮތުން ބޭނުންވާ ވަރަށް ބާރުނެތިގެން ކަންކަން ލަސްވެ ފަސްވާ ކަމަށްވެއްޖެއެވެ. ކުރިން އޮތް ރައްޔިތުންގެ މަޖިލީހުން ކޮމިޝަންތަކަށް ބާރުދޭން ދެކޮޅު ހަދާތީ އެއްވެސް ކަމެއް ކުރިޔަށް ކަނޑާ ކަމަކަށް ނުވިއެވެ. ކޮމިޝަންތަކަށް ބާރު ލިބިއްޖެނަމަ ކުށްވެރިވާނެ ގިނަ ބަޔަކު އެމަޖިލީހުގައި ތިބެގެން އެކަން ވިޔަނުދޭން އުޅޭކަމުގެ ތުހުމަތުގެ އިނގިލި އޭރުގެ މަޖިލީހަށް ދިއްކުރިއެވެ. ޚާއްޞަކޮށް އެމަޖިލީހުގެ ރައީސަށެވެ.
ރައްޔިތުންގެ މަޖިލީހުގެ އޭރުގެ ރައީސް ދައްކަމުން ދިޔަ ހުއްޖަތަކީ ވަގުތީ ކަމިޝަންތަކަކީ ފެކްޓްފައިންޑިންގ މިޝަން ތަކެއް ކަމަށެވެ. އެމީހުންގެ ހޯދުންތަކުން ލިބޭނަތީޖާގެ މައްޗަށް ޖިނާއީ ތަހުޤީޤު ހިންގަން ޖެހޭނީ ފުލުހާއި އެންޓި ކޮރަޕްޝަން ކޮމިޝަންފަދަ އެކަމަށް އުފައްދާފައިވާ މުއައްސަސާތަކުން ކަމަށެވެ. ވަގުތީ ކޮމިޝަންތަކަށް ވަގުތީ ޤާނޫނުތައް ހަދައިގެން ސިޔާސީ ވެރިއަކު އިސްކުރާ ބަޔަކަށް އިންސާފުވެރި ތަހުޤިޤެއް ކުރެވިދާނެ ކަމަކަށް ރައްޔިތުންގެ މަޖިލީހުގެ އޭރުގެ ރައީސް ގަބޫލެއް ނުކުރެއެވެ. އެރައީސް ދުށްގޮތުގައި ތަހުޤިޤީ އިދާރާތަކުގައި ތިބި މީހުން ކަމުނުދަންޏާ އެމީހުން ބަދަލު ކޮށްގެން ވެސް ކަންކުރަންވާނީ އެމުއައްސަސާ ތަކުންނެވެ. ކޮންމެ އަކަސް އެކޯޅުމުގައި ކޮމިޝަންތަކުން ބޭނުންވާ ބާރުތައް ނުލިބި މަޖިލީހުގެ ދައުރު ހަމަވީއެވެ. ބިޔަބޮޑު މެޖޯރޓީއެއް ސަރުކާރު ހިންގާ މައިޕާޓީއަށް އޮތް މަޖިލިހެއް އިންތިޚާބުވެ އެމަޖިލިހުގެ ފުރަތަމަ ކުރެވުނު އެއްމަސައްކަތަކަށްވީ ރިޔާސީ ކޮމިޝަންތައް އެދުނު މިންވަރަށް ޤާނޫނީ ބާރު ދިނުމެވެ. ނުލިބިގެން އުޅުނު ހުރިހާ ބާރެއް ރިޔާސީ ކޮމިޝަންތަކަށް ލިބުނުފަހުން ދޮޅުއަހަރު ވަނީއެވެ.
އަފްރާޝީމްގެ މަރު އެމްޑީއެން އެދޭގޮތަށް ދީނީގޮތުން ހައްދުފަހަނައަޅާފައިވާ ކަމަށް ބުނާބައެއްގެ ބޮލަށް ކަނޑާލީއެވެ. ޤާނޫނީގޮތުން އަދަބެއް ދެވޭވަރުގެ އެއްވެސް ހެއްކެއް ގަރީނާއެއް ނެތި ޔޯލަވާހަކަ އެއްހެން ރިޕޯޓެއް ނެރެލީއެވެ. ތުހުމަތުގެ އިނގިލި ދިއްކުރެވުނު ހައްދުފަހަނަ އަޅާފައި ތިބިކަމަށް ބުނާ މީހުން ތިބީ ވީއްލިފައެވެ. އެކަކަށް އެއް ފިޔަވަޅެއް ވެސް ނޭޅެއެވެ. ޝަރީޢަތެއް ނުހިންގެއެވެ. އެމަރަށް ހޭދަކުރީ ކޮންފައިސާއެއް ކިހާވަރަކަށް ކާކުކަމެއް ޔަޤީންކަމާއެކު ބުނެއެއް ނުދެވެއެވެ. އަނެއް ކޮޅުން އަފްރާޝީމްގެ ޢާއިލާއިންވެސް އެރިޕޯޓެއް ގަބޫލެއް ނުކުރެއެވެ.
ރައުދާގެ މަރުގެ ހަޤީޤަތްކަމަށް ބުނެ ހާމަކުރިއެއްވެސް އެއްޗަކުން ރައުދާގެ ޢާއިލާގެ ހިތައް ފިނިކަމެއް ހޯދައެއްނުދެވުނެވެ. ޔާމީން ރަޝީދުގެ މަރުގެ ހަޤީޤަތް އޮތީ އޮތްތާކުއެވެ. މަރުތަކަށް އިންސާފެއް ހޯދައެއް ނުދެވެއެވެ.ރިޟްވާން ގެއްލުމުގެ ހަޤީޤަތެއް ނުހޯދެއެވެ.
ދައުލަތުން ގެއްލިފައިވާ ފައިސާއާއި މުދާ ހޯދަން އެކުލަވާލި ކޮމިޝަންގެ ހާލު އަދި މާދެރައެވެ. ޤާނޫނީ ހުރިހާބާރެއް އޮވެމެ އެއްކަމެއް ކުރެވޭ ކަމިޝަނެއް ކަމަކަށް ނުވެއެވެ.އެމްއެމްޕީއާރުސީ ގެ ބޮޑު ޚިޔާނާތްވެސް އޮތީ ކުރީ ސަރުކާރުން ހިންގި ތަހުޤީޤުތަކުގެ މަތީގައެވެ. އައު ހޯދުމެއް އައު ހަޤީޤަތެއް ނުހޯދެއެވެ. ފިޔަވަޅެއް ނޭޅެއެވެ. ޑޮލަރު މާރުކުރުމެއް ޚިޔާނާތެއް މަސައްކަތު އަގެއް އެޔެއްމިޔެއް ވަތްކެއް ނުކުރެވެއެވެ. ރައީސް ޔާމީނު ޖަލަށް ލެވުނީމަ ގެއްލުނު މުދަލާ ފައިސާ ލިބުނު ކަމަށްވޭހެއްޔެވެ.
ރައްޔިތުން މަޖިލީހުގެ ކުރީގެ ރައީސް އޭރު އެ ބުނީ ރަނގަޅަށެވެ. ސިޔާސީ ވެރިޔަކު ސިޔާސީ ގޮތުން ހޮވާލައިގެން ނަގާ ކަމިޝަނަކުން ކުރެވޭނީ ސިޔާސީ މަސައްކަތެވެ. ޒާތީ ބަދަލު ހިފުމުގެ މަސައްކަތެވެ. ކަމުގެ ހަޤީޤަތް ހޯދުމަށް ވުރެ ވަކި ބަޔަކަށް އަމާޒު ކޮށްގެން ހިންގާ އެއްވެސް ތަޙުޤީޤަކުން ހަޤީޤަތެއް ނުހޯދޭނެއެވެ. ކުރެވޭނެ ކަމަކީ އަބުރުކަތިލުމެވެ. އަޅެފަހެ! ރިޔާސީ ކޮމިޝަންތަކަކީ ދަތްނެތް ސިންގާ ތަކެއް ނޫންހެއްޔެވެ.
Ads by STO
