ސަމާލުވޭ! މާސްކުތަކުގައި ސްކޫލްގެ ލޯގޯ އާއި އެނޫންވެސް ފަރުމާއެއް ހުރެގެން ނުވާނެ!
ކޮވިޑް-19 ރާއްޖޭގައި ފެތުރެމުން ދިޔުމާއި ގުޅިގެން، ރާއްޖޭގައި ފުރަބަންދު އިއުލާނުކޮށް ސްކޫލްތައް ވެސް ވަނީ ބަންދުކޮށްފައެވެ.
ނަމަވެސް އަންނަ މަހުގެ 1 ން ފެށިގެން ސްކޫލްތައް އަލުން ހުޅުވުމަށް މަސައްކަތް ކުރަމުންދާއިރު، އައު އާއްމުހާލަތުގެ ދަށުން ޢަމަލު ކުރަންވީ ގޮތުގެ ގައިޑްލައިނެއް އެޑިއުކޭޝަން މިނިސްޓްރީން ވަނީ އާއްމުކޮށްފައެވެ.
އެގޮތުން ސްކޫލްތަކުގެ ދަރިވަރުންނާއި ޓީޗަރުންވެސް މާސްކް އެޅުމަށް ސަމާލުކަން ދޭން ޖެހޭއިރު، އެމިނިސްޓްރީން ބުނެފައިވަނީ ދަރިވަރުންނާއި ޓީޗަރުންނާއި މުވައްޒަފުން ވެސް ބޭނުން ކުރަން ޖެހޭނީ އެއްވެސް ފަރުމާއެއް ނެތް ޕްލެއިން ފޮތިން ފަހާފައިހުރި މާސްކު ކަމަށެވެ. އަދި މާސްކުގައި ސްކޫލްގެ ލޯގޯ ޖެހުމާއި އެނޫންވެސް ޒީނަތްތެރި ކުރުމުގެ ގޮތުން އިތުރު ކުރެހުމެއް ނުވަތަ ފަރުމާއެއް މާސްކުގައި ހުރެގެން ނުވާނެ ކަމަށް ވެސް އެޑިއުކޭޝަނުން ބުނެފައިވެއެވެ.
މީގެއިތުރުން މާސްކު ހެދުމަށް ބޭނުން ކުރާ ފޮއްޗަކީ ރޮދި ކައިރިކޮށް ވިޔެފައި ހުންނަ ނޭވާލާން ފަސޭހަ ފޮއްޗަކަށް ވާން ޖެހޭނެ ކަމަށާއި މާސްކުގެ ބޭރު ފަށަލަ ހުންނަންވާނީ ފަސޭހައިން ފެން ނުއުފައްދާ ފޮއްޗަކުން ކަމަށް ވެސް ގައިޑްލައިންގައިވެއެވެ.
އަނގަޔާއި ނޭފަތް ރަނގަޅަށް ނިވާވެ ބަންދުވާނެހެން މާސްކު އަޅާފައި ހުރުމުގެ އިތުރުން ބޭނުން ކުރާ މާސްކަކީ ބާރުވެގެން ނުވަތަ ދޫވެގެން އަބަދު އަތްލާން ނުޖެހޭ މާސްކަކަށް ވާން ޖެހޭނެ ކަމަށް ވެސް އެޑިއުކޭޝަނުން އަންގާފައިވެއެވެ.
މާސްކް ފަހާފައި ހުންނަން ވާނީ ތިން ފަށަލައަށް ކަންވެސް އެޑިއުކޭޝަނުން ފާހަގަ ކޮށްފައިވެއެވެ.
Ads by STO
