ފުލުހުންގެ ޚިދުމަތުގެ ބިލަށް އާއްމުންގެ ޙިޔާލު ހޯދަނީ!
ފުލުހުންގެ ޚިދުމަތުގެ ބިލަށް އާއްމުންގެ ޙިޔާލު ހޯދަން ރައްޔިތުންގެ މަޖިލީހުން ހުޅުވާލައިފިއެވެ.
އެގޮތުން މަޖިލިހުން މިއަދު ނެރުނު ބަޔާނުގައި ބުނެފައިވަނީ ފުލުހުންގެ ޚިދުމަތުގެ ބިލަށް އެއްވެސް ޙިޔާލެއް ހުށަހަޅަން ބޭނުންފުޅުވާނަމަ ކޮމިޓީގެ އީމެއިލް [email protected] އަށް ޙިޔާލު ހުށަހެޅުމުގެ ފުރުސަތު އެބައޮތް ކަމަށެވެ.
އާއްމުންނަށް މިޙިޔާލު ހުށަހެޅުމުގެ ފުރުސަތު އޮތީ މިމަހުގެ 30 ވަނަ ދުވަހުގެ ކުރިންނެވެ.
ފުލުހުންގެ ޚިދުމަތްތަކާއި ގުޅޭގޮތުން ސަރުކާރުން ހުށަހަޅާފައިވާ ބިލުގައި ކޮމިޝަނަރ އޮފް ޕޮލިސް އައްޔަނު ކުރާނީ، މިބިލުގައި ބަޔާންކޮށްފައިވާ ޕްރޮމޯޝަން ބޯޑުން ވަޒަންކޮށް ހޯމް މިނިސްޓަރަށް ހުށަހަޅާ ނަންތަކުގެ ތެރެއިން ރައީސުލް ޖުމްހޫރިއްޔާއެވެ.
އެގޮތުން ސީޕީ ކަމުގެ މަގާމަށް އައްޔަނު ކުރެވޭ މީހާއަކީ ފުލުހުންގެ ޚިދުމަތުގެ ވަޒީފާގައި، އެސިސްޓަންޓް ކޮމިޝަނަރ އޮފް ޕޮލިހަށްވުރެ މަތީ ރޭންކެއްގައި ހުރި ބޭފުޅަކަށްވާން ޖެހެއެވެ. މިބިލު ފާސްވެ ގާނޫނަކަށްވާއިރު ކޮމިޝަނަރ އޮފް ޕޮލިސް އަށް މީހަކު އައްޔަނު ކުރެވިފައިވާނަމަ އެމަގާމަށް އިތުރު މީހަކު އައްޔަނު ކޮށްގެން ނުވާނެ ކަމަށް ވެސް ބިލުގައި ބަޔާން ކޮށްފައިވެއެވެ.
ސީޕީ ކަމުގެ މަގާމަށް ކުރިމަތިލާން ހުޅުވާލަނީ މިބިލުގައި ބަޔާންކޮށްފައިވާ ޕްރޮމޯޝަން ބޯޑުންނެވެ.
