ކްރިމިނަލް ކޯޓު ޑިސްއިންފެކްޓް ކުރުމަށް ޝަރީޢަތްތައް މެދުކަނޑާލައިފި
ކްރިމިނަލް ކޯޓުގެ މުވައްޒިފަކު ކޮވިޑް-19 އަށް ފައްސި ވެއްޖެކަން އިއްޔެ ހާމަވުމާއި ގުޅިގެން، އެކޯޓު ޑިސްއިންފެކްޓް ކުރުމަށް ޝަރީޢަތްތައް މެދުކަނޑާލައިފިއެވެ.
އެކޯޓުން މިއަދު ނެރުނު ބަޔާނެއްގައި ބުނެފައިވަނީ ޝަރީއަތްތައް މެދުކަނޑާލި ނަމަވެސް ބަންދުގެ މުއްދަތު އިތުރުކުރުމާއި ކޯޓު އަމުރު ނެރުމުގެ ކަންކަން ފަނޑިޔާރުންނާއި ކްރިމިނަލް ކޯޓުގެ މުވައްޒިފުން ގޭގައި ތިބެގެން ކުރަމުން ގެންދާނެ ކަމަށެވެ.
މީގެއިތުރުން ކްރިމިނަލް ކޯޓުން ބުނެފައިވަނީ، ކޮވިޑް އަށް ފައްސިވީ މުވައްޒިފާއި ކޮންޓެކްޓް ވީ އެހެން މުވައްޒިފުން މިހާރު ހޯދިފައިވާ ކަމަށާއި މުވައްޒިފަކު ފައްސިވީ ނަމަވެސް ގިނަ މުވައްޒަފުން ކަރަންޓީނަށް ދާން ނުޖެހޭނެ ފަދައިން ކޯޓުގެ މަސައްކަތްތަށް ތަރުތީބު ކުރެވިފައިވާ ކަމަށެވެ.
މިހާތަނަށް އެ ކޯޓުން މަސައްކަތް ކުރަމުން ދިޔައީ ދެ ދަންފަޅި އަކަށް ބަހާލައިގެންނެވެ. ދެ ދަންފަޅީގައިވެސް ފަނޑިޔާރުންނާއި މުވައްޒަފުން މަސައްކަތަށް ނިކުންނައިރު އެޗްޕީއޭގެ ގައިޑްލައިންތަކާއި އެއްގޮތަށް މަސައްކަތްތައް ކުރަމުން އަންނަ ކަމަށް ކްރިމިނަލް ކޯޓުން ބުންޏެވެ.
