ކަރުދާހުން ސައިކަލް ނަންބަރު ބޯޑު ހެދުމަކީ މަނާ ކަމެއް: ފުލުހުން
ކަރުދާހުން ސައިކަލު ނަންބަރު ބޯޑު ހެދުމަކީ މަނާ ކަމެއް ކަމުގައި ފުލުހުން ހާމަކޮށްފިއެވެ.
"ސައިކަލުގެ ނަންބަރު ބޯޑު ހުރީ ގަވައިދަށްތޯ" ނަމުގައި ފުލުހުން އާންމުކުރި ޕޯސްޓަރެއްގައި ވަނީ ނަންބަރު ބޯޑާ ގުޅުންހުރި ގިނަ ކަންތައްތަކެއް ކިޔައިދީފައެވެ.
އެގޮތުން ފުރަތަމަ ކަމަށް ކަރުދާހުން ނަންބަރު ބޮޑު ހެދުމަކީ މަނާކަމެއް ކަމުގައި ބުނެފައިވެއެވެ. ހަމައެހެންމެ ނަންބަރު ބޯޑު ހަލާކުވެފައި ހުރި ކަން އެނގި ހުރެ ސައިކަލު ދުއްވުމަކީ ވެސް މަނާ ކަމެއް ކަމުގައި ބުނެފައިވެއެވެ. ނަމަވެސް މިއީ އާންމުކޮށް ދިވެހިންގެ ތެރޭގައި ވަރަށް ހިނގާ ކަމެއް ކަން ވެސް ފާހަގަކޮށްލަންޖެހެއެވެ.
މީގެ އިތުރުން އެ އުޅަނދަކަށް ކަނޑައެޅިފައިވާ ނަންބަރު ބޯޑު ނޫން އެހެން ނަންބަރު ބޯޑެއް އަޅުވައިގެން ދުއްވުމާއި ނަންބަރު ބޯޑުގެ އަކުރުތައް ކަނޑައިގެން ވަކިން ބޭނުންކުރުމާއި އަކުރުތައް 1 ސެންޓިމީޓަރަށް ވުރެ އުސްކޮށް ބެހެއްޓުމަކީ ވެސް މަނާ ކަމެކެވެ.
މިއީ ފުލުހުން "މަގޭ ޒިންމާ" ގެ ނަމުގައި ރައްޔިތުން ހޭލުންތެރިކުރުމަށް ކުރިއަށްގެންދަމުން އަންނަ ޕްރޮގްރާމެކެވެ.
