ފިޓްފާޒިލް އަށް ފަހު، އެންމެންގެ ލޯ ކައިޒީން ގެ ގިވްއަވޭ އަށް
މި ދުވަސްކޮޅަކީ މީސް މީޑިއާ ގައި ތަފާތު އެކި ގިވްއަވޭތައް ގިނަ ދުވަސްވަރެކެވެ. އެގޮތުން ދިވެހިން މިހާތަނަށް ދުށް އެންމެ އަގުބޮޑު ދެ ގިވްއަވޭ ކަމުގައި ފިޓްފާޒިލް އާ އިންސްޓަގްރާމް މޮޑެލް ކައިޒީން ގެ ގިވްއަވޭ ވާނެއެވެ.
ނަމަވެސް ފިޓްފާޒިލް އޭނާގެ ގިވްއަވޭ ގެ ނަސީބުވެރިޔަކަށް ހޮވީ ފޭކް އައިޑީ އެއް ކަމަށް ބުނެ ގިނަ ބަޔަކު އަންނަނީ ފާޒިލް ދިވެހިންނަށް އޮޅުވާލައި މަކަރު ހެދީ ކަމުގައި ބުނަމުންނެވެ. އަދި ގިނަ ބަޔަކު އަންނަނީ އޭނާ އިންސްޓަގްރާމް އިން އަންފޮލޯ ވެސް ކުރަމުންނެވެ.
ކޮންމެހެނަކަސް މިފަދަ ކަމެއް ފާޒިލް ކުރިނަމަ މިއީ ވަރަށް ވެސް ހިތާމަހުރި ކަމެކެވެ. އަދި މިއީ އާއްމުންގެ ނުރުހުން އޭނާއަށް ވަރަށް ބޮޑަށް އަމާޒުވެސް ވާނެ ކަމެކެވެ.
ކުރިއަށް ދެން އޮތީ ކައިޒީން ގެ ގިވްއަވޭއެވެ. އިންސްޓަގްރާމްގައި ކައި ގެ ފޮލޯވަރުންގެ އަދަދު އެއް ލައްކައަށް އެރުމުގެ އުފަލުގައި، ގުރުއަތުން ހޮވޭ ތިން މީހަކަށް 1،000 އެމެރިކާ ޑޮލަރު (15،000 ރުފިޔާ) ލިބޭ މި ގިވްއަވޭގައި އޭނާގެ ޕޭޖް ފޮލޯކޮށް، އިނާމުދޭނެކަމަށް އިއުލާނު ކޮށްފައިވާ ޕޯސްޓަށް ލައިކް ދިނުމަށާއި، ކޮމެންޓު ސެކްޝަންގައި އިތުރު ތިން މީހަކު ޓެގް ކުރުމުގެ އިތުރުން، އެޕޯސްޓު އެމީހެއްގެ ސްޓޯރީއަށް ލުމަށްފަހު އިނާމު ލިބެންވީ ސަބަބު ބަޔާން ކުރުމަށް ވެސް ކައި ވަނީ އެދިފައެވެ. އަދި އެމީހެއްގެ ޕްރޮފައިލް ޕަބްލިކް ކުރުމަށް ޚާއްސަ ސަމާލުކަމެއް ދިނުމަށް ވެސް ކައިވަނީ އެދިފައެވެ.
ގިނަ ބަޔަކު އަންނަނީ ކައިޒީން ގެ ގިވްއަވޭ ހަމަހަމަކަމާއެކު ގުރުއަތުން ހޮވޭ ތިން ފަރާތަށް ދޭނެ ކަމަށް އުންމީދު ކުރާ ކަމަށް ބުނަމުންނެވެ. ނަމަވެސް ކައިޒީން ވެސް ފާޒިލް ފަދައިން ކަންތައް ކޮށްފާނެ ކަމަށް ބުނާ މީހުންގެ އަދަދުވެސް މަދެއް ނޫނެވެ.
މީސް މީޑިއާ ގައި ބައެއް މީހުން ހިއްސާ ކޮށްފައިވާ ގޮތުގައި މިހާރު ގިވްއަވޭ ތަކަށް ކުރެވޭ އިތުބާރު ވެސް ވަނި ގެއްލިފައެވެ.
ކައިޒީން ގެ ގިވްއަވޭ ގެ ނަސީބުވެރިޔާ އިއުލާނުކުރުން މި މަހުގެ 27 ވަނަ ދުވަހު އޮންނަ އިރު ގިނަ ބަޔަކު އަންނަނީ މި ދުވަހަށް ބޮޑު އިންތިޒާރެއް ކުރަމުންނެވެ.
