ވެކްސިން ޓޫރިޒަމް ތައާރަފްކުރުމުގެ ވިސްނުން އެބަހުރި: މައުސޫމް
ރާއްޖޭގައި ވެކްސިން ޓޫރިޒަމް ތައާރަފްކުރުމުގެ ވިސްނުން ގެންގުޅޭ ކަމަށް ޓުއަރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެއްޖެ އެވެ.
މައުސޫމް މިހެން ވިދާޅުވެފައި ވަނީ ރައްޔިތުން މަޖިލީހުގައި މައުސޫމަށް އަމާޒު ކުރި ސުވާލުތަކަށް ޖަވާބު ދެއްވަމުންނެވެ. މައުސޫމް ވިދާޅުވީ ވެކްސިން ދިނުން އެއީ އޭގެ ޒާތުގައި ރާއްޖެ ވިއްކުމަށް ވެސް ވަރަށް ބޮޑު އެހީތެރިކަމެއް ލިބޭ ކަމެއް ކަމަށެވެ.
އަދި ރާއްޖެ ޕްރޮމޯޓްކުރާ ގޮތަށް ވެކްސިންދޭ މަންޒިލެއްގެ ގޮތުގައި ރާއްޖެ އިޝްތިހާރު ކުރުމަށް ވިޒިޓް، ވެކްސިން، ވެކޭޝަންގެ ޓެގްލައިންއެއް ބޭނުން ކޮށްގެން ރާއްޖެ ޕްރޮމޯޓް ކުރުމުގެ ވިސްނުން އެބަހުރި ކަމަށެވެ.
" ވެކްސިން ދިނުން އެއީ އޭގެ ޒާތުގައި ރާއްޖެ ވިއްކުމަށް ވެސް ވަރަށް ބޮޑު އެހީތެރިކަމެއް ލިބޭ ކަމެއް. އަދި މުވައްޒަފުން އެކަށީގެންވާ ރައްކާތެރިކަމާ ސަލާމަތްތެރިކަން ހޯދުމުގައި އެކަން ވަރަށް މުހިންމު. އިރާދަކުރެއްވިއްޔާ ރާއްޖެ ވެގެންދާނެ ވެކްސިން ޓޫރިޒަމް ފެށޭ ގައުމެއްގައި " މައުސޫމް ވިދާޅުވިއެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އާންމު ކޮށްފައިވާ ޑޭޓާއަަށް ބަލާއިރު 3،306 މީހުންނަށް އިއްޔެ ކޮވިޑަށް ވެކްސިން ދީފައި ވެއެވެ. އަދި މިހާތަނަށް މުޅި ރާއްޖެއިން ޖުމްލަ 16،251 މީހުންނަށް ވެކްސިން ދީފައި ވެއެވެ.
މާލެ ސަރަޙައްދުގައި ވެކްސިން ދިނުމަށް ގާއިމް ކޮށްފައިވާ 6 ސެންޓަރުން މިހާތަނަށް ޖުމްލަ 13،418 މީހުންނަށް ވެކްސިން ދީފައިވާއިރު އަތޮޅުތެރޭގެ ދެ ސެންޓަރުން މިހާތަނަށް ޖުމްލަ 2،833 މީހަކަށް ވަނީ ވެކްސިން ދީފައި ވެއެވެ.
