ރައީސް އޮފީހުގެ ކޮމިއުނިކޭޝަން ސެކްރެޓަރީ އަންހެން ނޫސްވެރިއަކަށް ޖިންސީ ފުރައްސާރަކޮށްފި
ރައީސް އޮފީހުގެ ކޮމިއުނިކޭޝަން ސެކްރެޓަރީ ހަސަން އިސްމާއީލް އަންހެން ނޫސްވެރިއަކަށް ޖިންސީ ފުރައްސާރަ ކުރި މައްސަލައެއް ފެންމަތިވެއްޖެއެވެ.
މައުލޫމާތު ލިބިފައިވާ ގޮތުގައި ހަސަން އިސްމާއީލް ޖިންސީ ފުރައްސާރަ ކޮށްފައި ވަނީ ދި އެޑިޝަން އޮންލައިންގެ ނޫސްވެރިއެއް ކަމަށްވާ ރާއީ މުނައްވަރަށެވެ.
ރާއީ ވަނީ އެ މައްސަލަ ރައީސް އޮފީހުގެ ސަމާލުކަމަށް ވެސް ގެނެސްފައެވެ. ނަމަވެސް އެކަން ހިނގިތާ ދުވަސްތަކެއް ވެފައިވާއިރު، އަދިވެސް އެ މައްސަލަ ބަލާފައެއް ނުވެއެވެ.
މައުލޫމާތު އެނގޭ ފަރާތަކުން "ދެން" އަށް ކިޔައިދިން ގޮތުގައި ނޫސްވެރިއެއްގެ ހައިސިއްޔަތުން މައުލޫމާތެއް ސާފު ކުރުމަށް ރާއީ، ހަސަން އިސްމާއީލަށް ގުޅުމުން އޭނާ ވަނީ ޖިންސީ ވާހަކަތަކެއް ދައްކާފައެވެ.
"ހަސަން އިސްމާއީލް ބުނީ އެކަހެރިވެލަން ހިނގާށޭ. އަދި ބުނި ހިނގާބަލާށޭ ތިމަންނައާ އެކު ރިސޯޓަށް ދާން. މިހެން ގޮސް ތަފާތު އެކި ޖިންސީ ވާހަކަތައް އޭނާ ދެއްކީ" މައުލޫމާތު އެނގޭ މީހަކު ކިޔައިދިނެވެ.
މި މައްސަލަ ބަލަމުން އަންނަ ކަމެއް ފުލުހުންނާއި ޖެންޑާ މިނިސްޓްރީން ބުނެފައެއް ނުވެއެވެ.
މި މައްސަލަ ސަރުކާރުން ނުބެލިނަމަވެސް، މަގުމަތީގައި އަންހެން ކުދިންނަށް ޖިންސީ ފުރައްސާރަ ކުރި ދެ މީހެއްގެ މައްސަލަ ތަހުގީގުކޮށް މިހާރު ވަނީ ދައުވާ އުފުލާފައިކަން ފާހަގަކޮށްލެވެއެވެ.
