ރޭޕްގެ ތުހުމަތު ކުރެވޭ މީހާ ދޫކޮށްލީ އެމްޑީޕީ ޕާލިމެންޓްރީ ގްރޫޕްގެ މެމްބަރެއްގެ އާއިލާ މީހަށް ވީމަތޯ: ނިހާން
ހުޅުމާލޭ ކައިރީ އަޅާފައި އޮތް ސަފާރީއަކަށް ދިޔަ ބިދޭސީ އަންހެނަކަށް ޖިންސީ ގޯނާކުރި މައްސަލާގައި ހައްޔަރުކުރި މީހުން ދޫކޮށްލީ އެމްޑީޕީ ޕާލިމެންޓްރީ ގްރޫޕްގެ މެމްބަރެއްގެ އާއިލާ މީހަށް ވީމަތޯ ކުރީގެ ވިލިމާލެ ދާއިރާގެ މެމްބަރު އަހުމަދު ނިހާން ސުވާލު އުފައްދަވައިފިއެވެ.
އެ މައްސަލައިގެ ތުހުމަތުގައި ފުލުހުން ވަނީ އެ ސަފާރީ އިން 39 އަހަރުގެ ދެ ދިވެހިން ހައްޔަރުކޮށްފައެވެ. ފުލުހުން ބުނީ އެ މައްސަލާގައި ތަހުގީގަށް ހައްޔަރުކޮށްފައި ބެހެއްޓޭނެ އެކަށީގެންވާ ސަބަބެއް ނެތުމުން، އެ ދެމީހުން ވެސް މިހާރު ދޫކޮށްލާފައިވާ ކަމަށެވެ.
މި މައްސަލާގައި ތުހުމަތު ކުރެވޭ މީހުން ދޫކޮށްލުމާއެކު ގިނަ ބަޔަކު އަންނަނީ ފުލުހުންނަށް ފާޑުކިޔަމުންނެވެ.
އެމް.ޑީ.ޕީ ޕާލިމެންޓްރީ ގްރޫޕްގެ މެންބަރެއްގެ ޢާއިލާ މީހަށް ވީމަތޯ! @xahidcreator https://t.co/1rxiQLagiG
— Ahmed Nihan (@ahmed_nihan) June 27, 2020
މި މައްސަލާގައި ހައްޔަރުކުރި މީހުން ދޫކޮށްލާފައިވާއިރު އެ މައްސަލާގައި ތުހުމަތު ކުރެވެނީ މަޖިލިސް މެމްބަރެއްގެ ފިރިކަލުންނަށް ކަމަށް މީސް މީޑިއާގައި ބައެއް މީހުން އަންނަނީ ބުނަމުންނެވެ.
މިމައްސަލާގައި ތުހުމަތުވާ މީހުންގެ މައުލޫމާތު ހާމަކުރުމަށް ޕޮލިސް މީޑިއާގައި އެދުމުން ވެސް އެކަން ހާމަކޮށްފައެއް ނުވެއެވެ. ނަމަވެސް ފުލުހުންގެ އޮފިޝަލަކާ ހަވާލާދީ "ވޮއިސް" އިން ރިޕޯޓުކޮށްފައިވާ ގޮތުގައި ކުށުގެވެށިން ގެންދެވިފައިވަނީ ސަރުކާރުގެ އިސްފަރާތެއްގެ ފިރިކަލުންނެވެ.
