މޮސްޓާގެ ރައްދު މޫސައަށް: ދުބާއީގައި އުޅެފައި ރިޔާސީ ބަޔާން އިއްވާ ޖަލްސާއަށް ވަޑައިގެންނެވިއިރު ޙައްޤުތައް ކޮބާ؟
މުޒާހަރާތަކުގައި ބައިވެރިވާ މެންބަރުން ރައްޔިތުންގެ މަޖިލީހަށް ވަޑައިގަތުމުގެ ކުރިން ކޮވިޑް-19 އަށް ޓެސްޓު ހެއްދެވުން މުހިންމު ކަމުގައި ރައްޔިތުންގެ މަޖިލީހުގެ ކުރީގެ ނައިބު ރައީސް މޫސާ މަނިކު (ރީކޯ މޫސާ މަނިކު) ވިދާޅުވުމުން، ރައްޔިތުންގެ މަޖިލީހުގެ ނޮޅިވަރަމް ދާއިރާގެ މެމްބަރު މުޙައްމަދު ނަޝީދު ޢަބްދުﷲ (މޮސްޓާ) ރައްދު ދެއްވައިފިއެވެ.
ރައްޔިތުންގެ މަޖިލިސް ރައީސް މުޙައްމަދު ނަޝީދު ޓެގް ކުރައްވާ މޫސާ މަނިކު މިރޭ ކުރެއްވި ޓްވީޓެއްގައި ވިދާޅުވީ ރައްޔިތުންގެ މަޖިލީހުގައި މަސައްކަތް ކުރައްވާ މުވައްޒަފުންގެ ސަލާމަތަށްޓަކައި މުޒާހަރާތަކަށް ވަޑައިގަންނަވާ މެމްބަރުން މަޖިލިހަށް ވަޑައިގަތުމުގެ ކުރިން ކޮވިޑް-19 އަށް ޓެސްޓު ކުރުމާއި ނައްސި ނަތީޖާއެއް އޮތުން މުހިންމު ކަމަށެވެ.
މޫސަގެ އެވާހަކަތަކަށް ރައްދު ދެއްވަމުން މެމްބަރު ނަޝީދު ވިދާޅުވީ، މޫސާ މަނިކު ދުބާއީގައި އުޅުއްވާފައި ރައްޔިތުންގެ މަޖިލީހުގެ ރިޔާސީ ބަޔާން އިއްވާ ޖަލްސާއަށް ވަޑައިގެންނެވިއިރު، މެމްބަރުންގެ ޙައްޤުތައް ކޮބައިތޯއެވެ.
"ދުބާއީގައި ހިތު ހުރިގޮތަކަށް ތެޅިފައި މަޖިލިސް ހުޅުވުމުގެ ދެދުވަހެއް ކުރިން މާލެ ފުއްމާލާ ރިޔާސީ ބަޔާން އިއްވާ ޖަލްސާ އަށް ގޮސް އިންއިރު މުއައްޒަފުންނާއި މެމްބަރުންގެ ހައްގުތައް އޮތީ ކޮންތާކުބާ. މިކަހަލަ ދެބޯގެރި ދުއްވާ މީހުންނަށް ސަމާލުވޭ." މެމްބަރު ނަޝީދު ވިދާޅުވެފައި ވެއެވެ.
މޫސާ މަނިކު ދުބާއީގައި ހުންނެވުމަށްފަހު، އެނބުރި ރާއްޖެ ވަޑައިގަންނަވާ ކަރަންޓީނު ވެސް ނުވެ މަޖިލިހުގެ ރިޔާސީ ބަޔާން އިއްވި ޖަލްސާއަށް ވަޑައިގެންނެވި ކަމަށް މެމްބަރު ނަޝީދު މީގެ ކުރިންވެސް ވަނީ ތުހުމަތު ކުރައްވާފައެވެ.
އެތުހުމަތާ ގުޅިގެން ޖަވާބެއް ހޯދާލުމަށް "ދެން" ގެ ފަރާތުން މީގެކުރިން މޫސާ މަނިކަށް ގުޅާލުމުން، އެމަނިކުފާނު ވިދާޅުވީ އެމަނިކުފާނު ހުންނެވީ ލާމު އަތޮޅުގައި ކަމަށާއި ލާމު އަތޮޅުގައި ހުންނެވި މީހަކު ކަރަންޓީނު ވާން ނުޖެހޭނެ ނޫންތޯއެވެ. ދުބާއީއަށް ވަޑައިގަތިންތޯ ކުރި ސުވާލަށް މޫސާ މަނިކު ސީދާ ޖަވާބެއް ދެއްވާފައެއް ނުވެއެވެ.
