މީސްމީޑިއާ ގައި ދައުރުވަމުންދާ ކުޑަ ދެކުދިން ބަދު އަޚުލާގީ އަމަލު ހިންގާ ވީޑިއޯ އާއެކު، އިޖުތިމާއީ ހާސްކަން
ކުޑަ ދެ ކުދިން ގައިގޯޅިވާ މަންޒަރު ފެންނަ ވީޑިއޯ އެއް މީސް މީޑިއާ ގައި އާންމުވެއްޖެއެވެ.
މީސް މީޑިއާގައި އާއްމުކޮށްފައިވާ ވީޑިއޯ އިން ފެންނަނީ ކޮޓަރިއެއްގެ ތެރޭގައި ކުޑަ އަންހެން ކުއްޖަކާއި ފިރިހެން ކުއްޖަކު ގައިގޯޅިވާ މަންޒަރެވެ. އެ ކުޑަ ދެ ކުދިންގެ އުމުރާ ނުގުޅޭ އަމަލެއް ހިންގާ އެ މަންޒަރު ވީޑިއޯކޮށް، މީސް މީޑީއާ އަށް ދޫކޮށްލުމުން ގިނަ ބަޔަކު ދަނީ އެ ވީޑީއޯ ޝެއާ ކުރަމުންނެވެ.
ދިރިއުޅޭ މާހައުލުން ދަސްވާ، ކުދިންގެ އުމުރާ ނުގުޅޭ އަމަލަކަށް އަރައިގަންނަ އެ ވީޑިއޯއާ އެކު ގިނަ ބައަކު ދަނީ ކަންބޮޑުވުން ފާޅުކުރަމުންނެވެ. އެއް ބަޔަކު މުއައްސަސާތަކަށް އިނގިލި ދިއްކުރާއިރު، ބައެއް މީހުން ވަނީ ދަރިން ތަރުބިއްޔަތު ކުރުމުގައި ބައެއް މައިންބަފައިންގެ އިހުމާލުވަމުންދާ މިންވަރާ މެދުގައި ކަންބޮޑުވުން ފާޅުކޮށްފައެވެ.
މިކަމާއި ގުޅިގެން ފުލުހުން އަދި ޖެންޑާ މިނިސްޓްރީ އިން ވެސް ވަކި އެއްޗެއް ބުނެފައެއް އަދި ނުވެއެވެ.
މި އަހަރުގެ ކުރީކޮޅުގައި ވެސް ކުޑަކުދިންގެ މިފަދަ މައްސަލައެއް ވަނީ ފެންމަތިވެފައިވެއެވެ.
އެ މައްސަލަ އާ ގުޅިގެން، ކުޑަކުދިން ހިމެނޭ މައްސަލަތަކުގައި އެ ކުދިން ދެނެގަނެވޭ ފަދަ ވީޑިއޯ، ފޮޓޯ ނުވަތަ މަޢުލޫމާތު ޢާންމުކޮށް، އިތުރަށް ވިކްޓިމައިސް ކުރުމުގެ ބަދަލުގައި، އެ ބާވަތުގެ މައްސަލަތައް ފުލުހަށާއި މިނިސްޓްރީގެ 1412އަށް ރިޕޯޓުކުރުމަށް ޖެންޑާ މިނިސްޓްރީ އިން އިލްތިމާސްކޮށްފައިވެއެވެ.
ހަމައެހެންމެ ކުދިންގެ އަޚުލާގީ އެފަދަ މައްސަލަތައް ރެކޯޑުކޮށް، މީސް މީޑިއާގައި އާއްމުނުކުރަން ވެސް ފުލުހުން އިލްތިމާސްކޮށްފައިވެއެވެ. މީސް މީޑިއާ އަށް ދޫކޮށްލުމުގެ ބަދަލުގައި އެފަދަ މައްސަލަތައް ފުލުހުންނަށް ހުށަހެޅުމަށް ފުލުހުން ވަނީ އެދިފައެވެ.
ވީޑިއޯގައި އާއްމުވި ފަދަ އަމަލުތައް ކުޑަކުދިންނަށް ގިނަ ފަހަރަށް ދަސްވަނީ ގޭތެރޭގެ މާހައުލުންނެވެ. ކުދިންގެ އުމުރާ ނުގުޅޭ ޓީވީ ޕްރޮގްރާމްތައް ވެސް އޭގެ ތެރޭގައި ހިމެނެ އެވެ. ކުދިންގެ އުމުރާ ނުގުޅޭ މަންޒަރު ފެންނަ ޓީވީ ޕްރޮގްރާމްތައް ކުދިންގެ ހާޒިރުގައި ބެލުން މައްސަލައެއްގެ ގޮތުގައި ނުދެކި އިހުމާލުވެވުމަކީ ކުދިންގެ ތަރުބިއްޔަތަށް ނުރަނގަޅު އަސަރުކުރާ ކަމެއް ކަން މި މައްސަލައިގައި ކަންބޮޑުވި ބައެއް މީހުން ބުނެފައިވެއެވެ.
