ގިނަ އަދަދެއްގެ މަސްތުވާތަކެއްޗާއެކު ހައްޔަރުކުރި ޕެސްޓުގެ ބަންދަށް 15 ދުވަސް ޖަހައިފި
ގިނަ އަދަދެއްގެ މަސްތުވާތަކެއްޗާއެކު ހައްޔަރުކުރި ރާއްޖޭގެ މަޝްހޫރު ރެޕް އާޓިސްޓް އިސްމާއިލް އިފްހާމް މުހައްމަދު (ޕެސްޓް) 15 ދުވަހަށް ބަންދުގައި ބަހައްޓައިގެން ތަހުގީގު ކުރިއަށް ގެންދަން ކްރިމިނަލް ކޯޓުން މިއަދު އަންގައިފި އެވެ.
ފުލުހުންގެ ޑްރަގް އެންފޯސްމަންޓް ޑިޕާޓްމަންޓް (ޑީއީޑީ) އިން ރޭ މާލޭގައި ހިންގި އޮޕަރޭޝަނުން 2.5 ކިލޯ އަށް ވުރެ ގިނަ މަސްތުވާތަކެތި ވަނީ އަތުލައިގެންފައެވެ.
އެމައްސަލައާ ގުޅިގެން ޖުމްލަ ފަސް މީހަކު ހައްޔަރު ކޮށްފައިވާއިރު، އޭގެ ތެރޭގައި ސިމްބޮލިކް ރެކޯޑްސް ގެ ޕެސްޓް ވެސް ހިމެނެއެވެ.
މިމަައްސަލައިގައި ހައްޔަރުކުރި އެންމެންގެ ބަންދުގެ މުއްދަތު ޖެހުމަށް ކޯޓަށް ހާޒިރު ކުރުމުން، 15 ދުވަސް ތެރޭގައި މިނިސްޓްރީ އޮފް ހޯމް އެފެއާޒުން ކަނޑައަޅާ ތަނެއްގައި ބަންދުގައި ބަހައްޓައިގެން ތަހުގީގު ކުރިއަށް ގެންދިޔުމަށް ވަނީ އަމުރު ކޮށްފައެވެ.
ޕެސްޓު މަޝްހޫރުކަން އެންމެ ފުރަތަމަ ހޯދާފައި ވަނީ 2011 ވަނަ އަހަރު، އޭނާގެ އުމުރުން 16 އަހަރުގައި، ކިޔާފައިވާ "ރީތި ކުދިން" ލަވަޔާ އެކުގައެވެ.
