"މާރިޔާ އަހުމަދު ދީދީއަށް ފުލައިޓު ޗާޓަރުކޮށްގެން ރިހާކުރު ފުޅިއެއް ފޮނުވާފައިވޭ"
ފްލައިޓެއް ޗާޓަރުކޮށްގެން ޑިފެންސް މިނިސްޓަރު މާރިޔާ އަޙްމަދު ދީދީއަށް ރިހާކުރު ފުޅިއެއް ފޮނުވާފައިވާކަމުގައި ރައީސް އަލްއުސްތާޛު މައުމޫން ޢަބްދުލްޤައްޔޫމުގެ ސަރުކާރުގައި ހިނގައިދިޔަ އެފްޕީއައިޑީ ވައްކަމާ ގުޅޭ ރިޕޯޓުގައި އޮތް ކަމަށް ޕީއެންސީ ގެ ރައީސް އަބްދުއްރަހީމް އަބްދުﷲ ތުހުމަތުކުރައްވައިފިއެވެ.
އަދުރޭ މިހެން ވިދާޅުވީ ރައީސް މައުމޫނު ގެ ވެރިކަމުގައި ހިނގައިދިޔަ އެފްޕީއައިޑީ ގެ ވައްކަމާއި ގުޅޭ ރިޕޯޓު އަދިވެސް އޮތްތޯ ނޫސްވެރިޔަކު ކުރި ސުވާލަކަށް ޖަވާބު ދެއްވަމުންނެވެ.
އަދުރޭ ވިދާޅުވީ މަޖިލިހުގެ ކޮމިޓީއަކުން ތައްޔާރުކުރި ތަހުޤީޤު ރިޕޯޓު މިހާރުވެސް މަޖިލީހުގައި އޮންނާނެ ކަމަށެވެ. އެކަމާ ގުޅޭ ފުރިހަމަ މައުލޫމާތު މަޖިލިހުގެ މަރަދޫ ދާއިރާ މެންބަރު އިބްރާހީމް ޝަރީފު (މަވޯޓާ) އަށް އެނގިވަޑައިގަންނަވާނެ ކަމަށްވެސް އަބްދުއްރަހީމް ވިދާޅުވިއެވެ.
މީގެ އިތުރުން އަބްދުއްރަހީމް ވިދާޅުވީ އެ ރިޕޯޓު ރައީސް އޮފީހުގައި ވެސް އޮންނާނެ ކަމަށާއި އެއީ މިހާތަނަށް ދިވެހިރާއްޖޭގެ ތާރީޚުގައި ހިނގައިދިޔަ އެންމެ ބޮޑު ޚިޔާނާތް ކަމުގައެވެ.
އެގޮތުން އިނގިރޭސިވިލާތުގައި އެދުވަސްވަރު ކިޔަވަން ތިއްބެވި މިހާރުގެ ޑިފެންސް މިނިސްޓަރު މާރިޔާ އަހުމަދު ދީދީ ފަދަ ބޭފުޅުންނަށް ރިހާކުރު ފުޅިއެއް ހިފައިގެން ދަތުރުކޮށްފައިވާ ވާހަކަވެސް އެރިޕޯޓުގައި އޮންނާނެ ކަމަށް އަބްދުއްރަހީމް ވިދާޅުވިއެވެ.
