ފްލައިޓު ޗާޓަރުކޮށްގެން ރިހާކުރު ފުޅި ފޮނުވާފައެއް ނުވާނެ: މާރިޔާ
ފްލައިޓެއް ޗާޓަރުކޮށްގެން ޑިފެންސް މިނިސްޓަރު މާރިޔާ އަޙްމަދު ދީދީއަށް ރިހާކުރު ފުޅިއެއް ފޮނުވާފައިވާ ކަމަށް ދެކެވޭ ވާހަކަ އެކަމަނާ ދޮގުކުރައްވައިފިއެވެ.
" ހަމަ ކަނޑައެޅިގެން ރޯ ބުހުތާނު ދޮގު" އެ ހަބަރު ގެ ލިިންކް ޓްވީޓުކުރައްވައި މާރިޔާ ލިޔުއްވާފައިވެއެވެ.
ޕީއެންސީ ގެ ރައީސް އަބްދުއްރަހީމް އަބްދުﷲ ވިދާޅުވީ އިނގިރޭސިވިލާތުގައި އެދުވަސްވަރު ކިޔަވަން ތިއްބެވި މިހާރުގެ ޑިފެންސް މިނިސްޓަރު މާރިޔާ އަހުމަދު ދީދީ ފަދަ ބޭފުޅުންނަށް ރިހާކުރު ފުޅިއެއް ހިފައިގެން ދަތުރުކޮށްފައިވާ ވާހަކަ އެފްޕީއައިޑީ ވައްކަމާ ގުޅޭ ރިޕޯޓުގައި އޮތް ކަމަށް އަޑުއިވޭ ކަމަށެވެ.
އަދުރޭ ވިދާޅުވީ މަޖިލިހުގެ ކޮމިޓީއަކުން ތައްޔާރުކުރި ތަހުޤީޤު ރިޕޯޓު މިހާރުވެސް މަޖިލީހުގައި އޮންނާނެ ކަމަށެވެ. އެކަމާ ގުޅޭ ފުރިހަމަ މައުލޫމާތު މަޖިލިހުގެ މަރަދޫ ދާއިރާ މެންބަރު އިބްރާހީމް ޝަރީފު (މަވޯޓާ) އަށް އެނގިވަޑައިގަންނަވާނެ ކަމަށްވެސް އަބްދުއްރަހީމް ވިދާޅުވިއެވެ.
މީގެ އިތުރުން އަބްދުއްރަހީމް ވިދާޅުވީ އެ ރިޕޯޓު ރައީސް އޮފީހުގައި ވެސް އޮންނާނެ ކަމަށާއި އެއީ މިހާތަނަށް ދިވެހިރާއްޖޭގެ ތާރީޚުގައި ހިނގައިދިޔަ އެންމެ ބޮޑު ޚިޔާނާތް ކަމުގައެވެ.
