ފުލުހުންގެ ނިންމުން: އަނބިމީހާއަށް 3 ދުވަސް، ލޯބިވެރިޔާއަށް 3 ދުވަސް އަދި އޮފް 1 ދުވަސް
ރާންޗީ، އިންޑިއާ: އިންޑިއާގެ ސިޓީއެއް ކަމަށްވާ ރާންޗީގައި ފިރިހެނަކު އޭނާގެ އަނބިމީހާއަށް އޮޅުވާލިކަން ހާމަވުމުން ފުލުހުން ހައިރާންވާފަދަ ނިންމުމެއް ނިންމައިފިއެވެ.
މި ފިރިހެން މީހާ އާއި އޭނާގެ ލޯބިވެރިޔާ އަދި އަނބިމީހާއާ ދެމެދު ވަނީ އެއްބަސްވުމެއް ވެވިފައެވެ. އެގޮތުން އެ އެއްބަސްވުމުގައި ވާ ގޮތުގައި މި ފިރިހެން މީހާ ހަފްތާގެ 3 ދުވަސް ހޭދަ ކުރަން ޖެހޭނީ އޭނާގެ އަނބިމީހާއާ އެކުގައެވެ. އަދި ހަފްތާގެ އަނެއް 3 ދުވަސް އޭނާގެ ލޯބިވެރިޔާއާ އެކުގައެވެ. އަދި ކޮންމެ ހަފްތާއެއްގައި ވެސް އޭނާއަށް "އޮފް"ގެ ގޮތުގައި 1 ދުވަސް ލިބިގެން ދާނެއެވެ.
ރާޖޭޝް މަހަޓޯ ނަމަކަށް ކިޔާ މި ފިރިހެން މީހާ ވަނީ އޭނާގެ އަނބިމީހާއަށް އޮޅުވާލައި އެހެން އަންހެނަކާ ލޯބީގެ ގުޅުން ބާއްވާފައެވެ. އަދި އޭނާ ވަނީ އޭނާގެ "ވަގު ލޯބިވެރިޔާ" ގާތުގައި އޭނާ އަަކީ ހުސްހަށިބައި މީހެއް ކަމުގައި ބުނެ އޭނާއަށް ވެސް އޮޅުވާލައިފައެެވެ.
މި ފިރިހެން މީހާ އޭނާގެ އަނބިދަރީން ދޫކޮށް އޭނާގެ ލޯބިވެރިޔާގެ ގާތަށް ގޮސްފައިވާއިރު މި މައްސަލަ ފުލުހަށް ، އޭނާގެ އަނބިމީހާ ހުށަހަޅާފައިވަނީ މިދިޔަ އަހަރުގެ ޖަނަވަރީ މަހުގައެެވެ. އަދި ރަހީނު ކޮށްގެން އަންހެނަކު ގެންގުޅޭ ކަމުގެ މައްސަލައެއް އޭނާގެ ލޯބިވެރިޔާގެ އާއިލާއިން ވެސް މި ފިިރިހެން މީހާއާ ދެކޮޅަށް ވަނީ ކޮށްފައެެވެ.
ފުލުހަށް ހުށަހެޅުނު މައްސަލަތަކާއެކު ފުލުހުން ވަނީ ރާޖޭޝް ހޯދުމުގެ މަސައްކަތް ފަށައި އެ މަސައްކަތް ކާމިޔާބު ކޮށްފައެވެ. އޭނާ ފެނުނީ އޭނާގެ ލޯބިވެރިޔާއާ އެކުގައި އުޅެނިކޮށެވެ. އަދި އެ ދެމީހުން ފިލައިގެން ގޮސް ކައިވެނި ވެސް ކޮށްގެން އުޅޭ ކަމަށް އޭނާގެ ލޯބިވެރިޔާއާ ހަވާލާދީ ފުލުހުން ބުނެއެވެ.
އެކަން އެނގުމާއެކު އޭނާގެ ލޯބިވެރިޔާ އާއި އަނބިމީހާ ވަނީ ޒުވާބު ކުރަން ފަށައިފައެވެ. އަދި މި މައްސަލަ މާ ހޫނުވާން ފެށުމުން ފުލުހުން ވަނީ ހައިރާން ކުރުވަނިވި ނިންމުމެެއް ނިންމާފައެވެ. އެގޮތުން އަނބިމީހާއަށް 3 ދުވަސް، ލޯބިވެރިޔާއަަށް 3 ދުވަސް އަދި އޮފް 1 ދުވަސް ކޮންމެ ހަފްތާއަކު ވެސް އެ ފިރިހެންމީހާއަށް ދިނުމަށް ފުލުހުން ވަނީ ނިންމާފައެެވެ.
ގަބޫލު ކުރިޔަސް ނުކުރިޔަސް މި ތިން މީހުން ވެސް ވަނީ މިގޮތަށް އެއްބަސްވެ ލިޔުމެއްގައި ވެސް ސޮއި ކޮށްފައެވެ.
