ކެފޭ، ރެސްޓޯރަންޓްތަކުގައި ސިނގިރޭޓު ބޮވޭ ގޮތަށް އުސޫލު ބަދަލުކޮށްފި

ކޮވިޑް-19 ފެތުރޭތީ ކެފޭ، ރެސްޓޯރެންޓްތައް ބަންދުކުރުމަށް ފަހު އަލުން ހުޅުވުމުގެ ހުއްދަ ދޭން ނިންމިއިރު ދުންފަތުގެ އިސްތިއުމާލު ކުރުން މަނާކުރި ނަމަވެސް އެ އުސޫލު މިހާރު ބަދަލުކޮށް ހުއްދަ ދީފައިވާ ކަމަށް، ހެލްތް ޕްރޮޓެެކްޝަން އެޖެންސީ (އެޗްޕީއޭ) އިން މިއަދު ބުނެފި އެވެ.

Ads by MWSC

މިދިޔަ މެއި މަހުގެ 20 ވަނަ ދުވަހު ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ނެރުނު ކާބޯތަކެތީގެ ހިދުމަތްދޭ ތަންތަނުން "ނިއު ނޯމަލް" ގައި ހިދުމަތް ދިނުމުގެ އުސޫލުގައި ބުނެފައިވާ ގޮތުގައި، ކާބޯތަކެތީގެ ހިދުމަތްދޭ ތަންތަނުގައި ސިނގިރޭޓާއި، ޝީޝާއާއި، ވޭޕާއި، އީ-ސިނގިރޭޓު ހިމެނޭ ގޮތަށް ދުންފަތުގެ އިސްތިއުމާލު ކުރުން މަނަ އެވެ.

އެ އުސޫލު އިސްލާހުކޮށް މިދިޔަ މަހުގެ 27 ގައި އާންމުކުރި އުސޫލުގައި ބުނެފައިވަނީ ކާބޯތަކެތީގެ ވިޔަފާރިކުރާ ތަންތަނުގައި އެހެން މީހުންނަށް ދުން ނުފޯރާވަރުގެ ދުރުމިނެއްގައި ތިބެންގެން ސިނގިރޭޓު ބޮވޭނެ ކަމަށެވެ. އެއީ ކުރިން އެޗްޕީއޭއިން އެ ކަމަށް ހުއްދަ ދީފައިވާ ތަންތަނުގަ އެވެ. އެކަމަކު ޝީޝާ ބުއިން މަނާ ކަމަށް އުސޫލުގައިވެ އެވެ.

މާލެ ސަރަހައްދުގެ ކެފޭ އަދި ރެސްޓޯރެންޓްތައް ހުޅުވުމުގެ ހުއްދަ ދީފައި ވަނީ މަ މަހު 1 އިން ފެށިގެންނެވެ.