ކުޑަ ކުއްޖާގެ މައްސަލާގައި ކަމާބެހޭ ފަރާތްތައް ޖަވާބުދާރީ ކުރުވާނަން: ނަޝީދު
ގއ. ކަނޑުހުޅުދޫގައި ދެ އަހަރުގެ ކުޑަ އަންހެން ކުއްޖަކު ރޭޕްކުރި މައްސަލާގައި ކަމާބެހޭ ފަރާތްތައް ޖަވާބުދާރީ ކުރުވާނެ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިއަދު ކުރެއްވި ޓްވީޓެއްގައި ވިދާޅުވީ ތުއްތު ކުއްޖަކު އޭނާގެ އަމިއްލަ މުނިކާފަ، ކާފަ އަދި ބައްޕަގެ ޖިންސީ ޝިކާރައަކަށް ވުމަކީ އިންތިހާއަށް ކަންބޮޑުވުންހުރި ލަދުވެތި ކަމެއް ކަމަށެވެ. އަދި މިކަމާ ގުޅޭގޮތުން އެކި އެކި ފަރާތްތަކުން ޖަވާބުދާރީ ކުރުމަށް މަޖިލީހުން މަސައްކަތް ކުރާނެ ކަމަށް ނަޝީދު ވިދާޅުވިއެވެ.
އެ ކުއްޖާ ރޭޕްކުރި ކަމަށް ތުހުމަތު ކުރެވިފައިވަނީ އެ ކުއްޖާގެ މުނިކާފަ އަދި ކާފަ އަށެވެ. މި މައްސަލާގައި އެ ކުއްޖާގެ ބައްޕަ ވެސް ހައްޔަރުކޮށްފައިވާއިރު އޭނާގެ މައްޗަށް ކުރެވިފައިވަނީ ކުއްޖާ އަށް އިހުމާލުވުމުގެ ތުހުމަތެވެ. މި އެންމެން ވެސް އިއްޔެ ހައްޔަރުކޮށް ވަނީ ބަންދަށް 15 ދުވަސް ޖަހާފައެވެ.
ޖިންސީ ގޯނާގެ ޝިކާއަރަކަށްވި އެ އަންހެން ކުއްޖާ މިހާރު ވަނީ ޖެންޑާ މިނިސްޓްރީގެ ބެލުމުގެ ދަށަށް ގެންގޮސްފައެވެ. އަދި މި މައްސަލަ ފުލުހުންނާއި ގުޅިގެން ތަހުގީގު ކުރަމުން އަންނަ ކަމަށްވެސް ޖެންޑާ މިނިސްޓްރީން ބުނެއެވެ.
މި މައްސަލަ މީޑިޔާތަކުގައި ރިޕޯޓު ކުރުމާއެކު އާންމުން އަންނަނީ އެކަން ކުރި ފަރާތްތަކަށް އެންމެ ހަރުކަށި އަދަބު ދިނުމަށް ގޮވާލަމުންނެވެ.
Ads by STO
