ޕީޕީއެމްގެ ޕްރައިމަރީ އަންނަ މަހުގެ ހަތެއްގައި
ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް)ގެ ޓިކެޓުގައި ލޯކަލް ކައުންސިލް އިންތިހާބުގައި ވާދަކުރާ ކެންޑިޑޭޓުން ހޮވުމަށް ބާއްވާ ޕްރައިމަރީ އަންނަ މަހުގެ ހަތްވަނަ ދުވަހު ބޭއްވުމަށް އެ ޕާޓީން ނިންމައިފިއެވެ.
ޕީޕީއެމްގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި އެ ޕާޓީގެ ތަރުޖަމާނު ހީނާ ވަލީދު ވިދާޅުވީ އަންނަ މަހުގެ ހަތެއްގައި ޕްރައިމަރީ ބޭއްވުމަށްފަހު ދެވަނަ ބުރެއް ބާއްވަން ޖެހިއްޖަނަމަ އެ ބުރު އަންނަ މަހުގެ ނުވަވަނަ ދުވަހު ބާއްވާނެ ކަމަށެވެ.
އިއްޔެ އިން ފެށިގެން ޕީޕީއެމް އިން ވަނީ ކެންޑިޑޭޓުންނަށް ވޯޓާސް ލިސްޓު ދިނުމުގެ މަސައްކަތް ފަށައިފައެވެ. ވޯޓާސް ލިސްޓަށް ޝަކުވާ ހުށަހެޅުމުގެ ފުރުސަތު ހުޅުވާލާފައިވަނީ އަންނަ ބުދަ ދުވަހުގެ ރޭ 10:00ގެ ނިޔަލަށެވެ. އަދި އަންނަ އާދީއްތަ ދުވަހުގެ ކުރިން ދާއީމީ ވޯޓާސް ލިސްޓު ކެންޑިޑޭޓުން ފޯރުކޮށްދޭނެ ކަމަށް ޕީޕީއެމުން މައުލޫމާތުދެއެވެ.
އަންނަ އޭޕްރީލް މަހުގެ ހަތަރުވަނަ ދުވަހު ބާއްވާ ކައުންސިލް އިންތިހާބުގައި ޕީޕީއެމުން ހުރިހާ ދާއިރާއަކަށް ވާދަކުރުމަށް ނިންމާފައިވާ އިރު، ޕީޕީއެމްގެ ޕްރައިމަރީގައި ވާދަކުރަން ބޭނުންވާ ފަރާތްތަކަށް އަންނަ ހުކުރު ދުވަހުގެ ހަވީރު 4:00ގެ ނިޔަލަށް ވަނީ ފުރުސަތު ހުޅުވާލައިފައެވެ.
