ރައީސް ނަޝީދުގެ އިރުޝާދާއެކު ކެމްޕޭނަށް މެމްބަރުން އަތޮޅު ތެރެއަށް
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދުގެ އިރުޝާދުގެ ދަށުން، ރައްޔިތުންގެ މަޖިލީހުގެ މެންބަރުން ކެމްޕެއިނު ކުރުމަށް އަތޮޅު ތެރެއަށް ވަޑައިގެންފިއެވެ.
ރައްޔިތުންގެ މަޖިލީހުގެ އިއްޔެގެ ޖަލްސާގައި ރައީސް ނަޝީދު ވަނީ މެމްބަރަކު ކެމްޕޭނަށް، އެ މެމްބަރެއްގެ ދާއިރާއަށް ވަޑައިގަންނަވަން ބޭނުންނަމަ، މަޖިލީހުގައި އެކަމަށް އެދިއްޖެނަމަ އެމަނިކުފާނު އެކަމަށް ފަހި ކޮށްދެއްވާނެ ކަމަށް ވިދާޅުވެފައެވެ.
މިއަދުގެ މަޖިލިސް ޖަލްސާގައި ހާޒިރީ އިއުލާނު ކުރައްވަމުން މަޖިލިސް ރައީސް ވިދާޅުވީ މިއަދު ޖަލްސާއަށް ހާޒިރުވެ ތިއްބެވީ 27 މެމްބަރުން ކަމަށާއި ސަލާމުގައި 7 މެންބަރަކު ތިއްބެވި ކަމަށެވެ.
އެގޮތުން ސަލާމުގައި ތިއްބެވި ފުވައްމުލަކު ދާއިރާގެ 3 މެންބަރުން ސަލާމް ވިދާޅުވެފައި ވަނީ ކެމްޕޭނަށް ދާއިރާއަށް ވަޑައިގަތުމަށް ކަމަށް ވެސް ރައީސް ނަޝީދު ވިދާޅުވިއެވެ.
"ފުވައްމުލަކުގެ ތިން އިއްޒަތްތެރި މެމްބަރުން ވަޑައިގެންވީ އެބޭފުޅުންގެ ދާއިރާގައި ކެމްޕޭނުގައި. އަޅުގަނޑު އެބޭފުޅުންނަށް ދެންނެވިން އޭގަ އެންމެ ރީތި ރަނގަޅު ގޮތަކީ އެއް ދުވަހުގެ ސަލާމެއް ވިދާޅުވެފައި ވަޑައިގެން، ފަހުން އެނބުރި ވަޑައިގަތުމޭ،" އެމަނިކުފާނު ވިދާޅުވި އެވެ.
ރައީސް ނަޝީދު އިއްޔެ ވިދާޅުވީ މެންބަރަކު ކެމްޕޭނަށް ރަށަށް ދުރުވަން އެދިއްޖެނަމަ އެކަން މަޖިލީހުގެ އިދާރާއިން ފަހި ކޮށްދޭނެ ކަމަށެވެ.
