ސިވިލް ސާވެންޓުންނަކީ އަޅުންކަމަށް ބުނުމުން ހައިރާނެއް ނުވޭ: ޖަމީލް
ސިވިލް ސާވިސް މުވައްޒަފުންނަކީ "މޫނެއް ނެތް، އަޑެއް ނެތް" ބައެއް ކަމަށް ރައްޔިތުންގެ މޖިލީހުގެ ހޯރަފުށީ ދާއިރާގެ އެމްޑީޕީ މެމްބަރު އަހުމަދު ސަލީމް ވިދާޅުވެ ދެއްކެވި ވާހަކަފުޅަށް ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދު ރައްދު ދެއްވައިފިއެވެ.
ސިވިލް ސާރވިސް ޤާނޫނަށް އައްޑޫ މީދޫ ދާއިރާގެ މެންބަރު ރޮޒައިނާ އާދަމް ހުށައެޅުއްވި އިޞްލާހަށް މަޖިލީހުގައި ވާހަކަފުޅު ދައްކަވަމުން ސައްލެ ވިދާޅުވީ، ސިވިލް ސާވިސް މުވައްޒަފުންނަށް ބޭނުންހާ ވާހަކައެއް ނުދެއްކޭނެ ކަމަށާއި، ނުވެސް ލިޔެވޭނެ ކަމަށެވެ. އަދި ސިވިލް ސާވިސް މުވައްޒަފުން ވާންޖެހެނީ “ފޭސް ލެސް” ނުވަތަ މޫނެއް ނެތް ބަޔަކަށް ކަމުގައިވެސް ސައްލެ ވިދާޅުވިއެވެ. އަދި ސިވިލް ސާވިސްގެ މުވައްޒަފަކީ އޭނާގެ ވަޒީފާގެ އެއްބަސްވުމުގައި ސޮއިކުރާ ހިސާބުން ފެށިގެން ކަށްވަޅަށް ދިއުމާ ހަމައަށް އަނގައިން ނުބުނެވޭނެ މީހެއް ކަމަށް ސައްލެ ވަނީ ވިދާޅުވެފައެވެ.
ސަލީމްގެ އެވާހަކަތަކާ ގުޅިގެން ޖަމީލް ވިދާޅުވީ ސިވިލް ސާވަންޓުންނަކީ އަޅުންކަމަށް ވިދާޅުވެ އެމްޑީޕީ މެންބަރަކު ވާހަކަ ދެއްކެވުމުން ހައިރާން ވާން ޖެހޭ ކަމެއް ނޫން ކަމަށެވެ.
އަދި ތަންތާ ހުޅުޖަހައި، ބުލީކޮށް ފޮށުމުން އެމްޑީޕީން އުފާވާނެ ކަން ފާހަގަކޮށް ޖަމީލް ވިދާޅުވީ ހަގީގީ ހަރުކަށި އަދި ހައްދު ފަހަނަ އަޅާފައިވާ ފިކުރު ފެންނަނީ އެމްޑީޕީން ކަމަށެވެ.
ސަލީމްގެ އެ ވާހަކަފުޅަށް ވަރަށް ގިނަ ސިވިލް ސާވަންޓުންނާއި އާންމުން ވެސް ނުރުހުން ފާޅުކުރިއެވެ. އެވާހަކަތަކާމެދު ކަންބޮޑުވުން ފާޅުކުރި މީހުން ފާހަގަ ކުރި ގޮތުގައި އެހެން ރައްޔިތުންނެކޭ އެއްފަދައިން ސިވިލް ސާވަންޓުންނަށް ވެސް ޚިޔާލު ފާޅު ކުރުމުގެ މިނިވަންކަން އޮންނަން ވާނެއެވެ.
