ހަމަދު ސްކޫލްގެ ފަންކާއެއް ވެއްޓި ދެ ކުއްޖަކަށް އަނިޔާވެއްޖެ
ލ. ގަމު ހަމަދު ސްކޫލްގެ ކްލާހެއްގެ ފަންކާ ވެއްޓި ދެ ކުއްޖަކަށް އަނިޔާވެއްޖެ އެވެ.
އެ ސްކޫލްގެ ޕްރިންސިޕަލް މުހައްމަދު ޝައުކަތު "މިހާރު" ނޫހަށް ވިދާޅުވީ، ފަންކާ ވެއްޓުނީ ކްލާހުގެ ޑެސްކެއްގެ މައްޗަށް ކަމަށް ވިޔަސް އޭގެ ފިޔައަކުން ދެ ކުއްޖެއްގެ ގައިގައި ޖެހި ކޮންމެވެސް ވަރަކަށް އަނިޔާވި ކަމަށެވެ.
ހެނދުނު 10 ޖަހާކަން ހާއިރު ހިނގި މި ހާދިސާގައި ފަންކާ ވެއްޓި އަނިޔާވީ ގްރޭޑް ހަތެއްގެ ކުދިންތަކެއްގެ ކްލާހެއްގެ ދެ ކުއްޖަކަށެވެ.
ޝައުކަތު ވިދާޅުވީ އެ ދެ ކުދިން ހޮސްޕިޓަލަށް ގެންގޮސް ފަރުވާ ދިން ކަމަށާއި އެ ކުދިންނަށް ސީރިއަސް އަނިޔާއެއް ނުވާ ކަމަށެވެ.
"[އެ ދެކުދިންގެ ގައިން] ކުޑަ ތަންކޮޅެއް މަށައިގެން ގޮސް އިނީ. [ހޮސްޕިޓަލުން އައިސް] މިއަދުގެ ސެޝަން ފުރިހަމަ ކޮށްފައި އެ ދެ ކުދިން ގެއަށް ވެސް ދިޔައީ،" ޕްރިންސިޕަލް ވިދާޅުވި އެވެ.
ޝައުކަތު ވިދާޅުވީ އެ ކްލާހުގައި އާ ފަންކާއެއް ހަރުކުރާނެ އެވެ. އަދި މާދަމާގެ ކުރިން އެކަން ކޮށް ނިންމުމުގެ އިތުރުން، އެހެން ކްލާސްތަކުގެ ހާލަތު ވެސް މިއަދު ބަލާނެ ކަމަށް އޭނާ ވިދާޅުވި އެވެ.
Ads by STO
