ނައިފަރުން ކޮވިޑަށް ފައްސިވި މީހުންގެ އަދަދު 72 އަށް
ޅ. އަތޮޅު ނައިފަރުން އިތުރު 29 މީހަކު ކޮވިޑް-19 އަށް ފައްސިވެ، އެރަށުން ފައްސިވީ ޖުމްލަ އަދަދު 72 އަށް އަރައިފިއެވެ.
މީހުން ފައްސިވާ އަދަދު ގިނަ ވުމާ ގުޅިގެން ކޮވިޑް-19 އިން ރައްކައުތެރިވުމަށް ނައިފަރުގައި ހާއްސަ ފިޔަވަޅުތަކެއް އަޅާކަން އަންގައި ޑިރެކްޓާ ޖެނެރަލް އޮފް ޕަބްލިކް ހެލްތު މައިމޫނާ އަބޫބަކުރު ސޮއިކޮށް ލިޔުމެއް ވަނީ އާއްމު ކޮށްފައެވެ. އެ ލިޔުމުގައިވާ ގޮތުން ހަތް ދުވަހުގެ މުއްދަތަށް، ނައިފަރުގައި ބޮޑެތި ފިޔަވަޅުތަކެއް އަޅަން ވަނީ އަންގާފައެވެ.
އެގޮތުން ޒަރޫރީ ބޭނުންތަކާއި ސިއްހީ ފަރުވާ ހޯދުމަށް ދާ ދިޔުން ފިޔަވައި އެހެނިހެން ބޭނުންތަކަށް، މަގުމައްޗާއި އާންމު ތަންތަނަށް ނުކުމެ އުޅުން ހުއްޓައިލުމާއި، އެއްފަހަރާ ތިން މީހުންނަށްވުރެ ގިނަމީހުން، މަގުމައްޗާއި އާންމު ތަންތާނގައި އެއްވެ އުޅުން ހުއްޓައިލުމުގެ އިތުރުން އެއް ގެއިން އަނެއް ގެއަށް ޒިޔާރަތް ކުރުން ހުއްޓައިލުމަށް ވަނީ އަންގާފައެވެ.
އަދި ޕާޓީތަކާއި، ހަފްލާތަކާއި، ރަސްމިއްޔާތުތައް ބޭއްވުން ހުއްޓައިލުމާއި، ހޮޓާތަކާއި، ކެފޭތަކާއި، ރެސްޓޯރަންޓްތަކުން ދެމުންގެންދާ ހިދުމަތްތައް ހުއްޓައިލަން ވެސް ވަނީ އަންގާފައެވެ. އޭގެ ތެރޭގައި ޑެލިވަރީގެ ހިދުމަތް ދިނުމެއް ނުހިމެނެއެވެ.
މީގެ އިތުރުން ސެލޫންތަކާއި، ޖިމްތަކާއި، ބޯކޮށާ ތަންތަން ބަންދު ކުރުމާއި، ކުޅިވަރުގެ ހުރިހާ ހަރަކާތްތަކާއި، ކަސްރަތުގެ ހަރަކާތްތައް ހިންގުން ހުއްޓައިލުމާއި، ޓެކްސީގެ ހިދުމަތް ދޭ ފަރާތްތަކުން، އެޗްޕީއޭއިން އާންމުކޮށްފައިވާ ގައިޑްލައިނާ އެއްގޮތަށް ޓެކްސީގެ ހިދުމަތް ދިނުމާއި، ފިރާތަކާއި ބޭންކުތައް ފަދަ އާންމު ހިދުމަތް ދޭ ތަންތަނުގައި ހިދުމަތް ދޭއިރު، ހެލްތް ޕްރޮޓެކްޝަން އެޖެންސީން އާންމުކޮށްފައިވާ ގައިޑްލައިނާ އެއްގޮތަށް ގައިދުރުކަން ބެހެއްޓުމާއި، ތަނަށް ވަދެވޭ އަދަދު ކަނޑައެޅުމާއި، ރައްކާތެރިކަމުގެ އެހެނިހެން ފިޔަވަޅުތައް އަޅައިގެން ހިދުމަތް ދިނުން ވެސް ހިމެނެއެވެ. އަދި ކޮލެޖް ޔުނިވާސިޓީގެ ކިޔެވުމާއި، ސްކޫލްތަކަށް ހާޒިރު ކޮށްގެން ކިޔަވައިދިނުން ހުއްޓާލުމަށް ވެސް ވަނީ އަންގާފައެެވެ.
