މިސްކިތްތަކުގައި ރޯދަވީއްލާއިރު ގައިދުރުކަން ޔަގީން ކުރަން އިލްތިމާސްކޮށްފި
ކުރިއަށް އޮތް ރަމަޟާން މަހު މިސްކިތްތަކުގައި ރޯދަ ވީއްލާއިރު، ގައިދުރުކަން ޔަގީން ކުރަން މިނިސްޓްރީ އޮފް އިސްލާމިކް އެފެއާޒުން އިލްތިމާސް ކުރައްވައިފިއެވެ.
އިސްލާމިކް މިނިސްޓްރީން ވިދާޅުވީ 1442 ވަނަ އަހަރުގެ ރަމަޟާން މަހު މާލޭ ސިޓީގެ މިސްކިތްތަކަށް ރޯދަ ވީއްލަން ތަކެތި ގެންދާ ފަރާތްތަކުން މިސްކިތްތަކުގައި ރޯދަ ވީއްލަން ތަކެތި ބަހައްޓަން ވާނީ އެކަކު އަތްލާ ތަކެތީގައި އަނެއް މީހާއަށް އަތް ނުލެވޭ ގޮތަށް ކޮންމެ މީހަކަށް ވަކިވަކިން ބޭނުން ކުރެވޭނެ ގޮތަށް ބަންދު ކޮށްފައި ކަމަށެވެ. އަދި ޖޫސް ފަދަ ތަކެތި ގެންދާނަމަ، އެތަކެތި ހުންނަންވާނީ ކޮންމެ މީހަކަށް ވަކިން ބޭނުން ކުރެވޭނެ ގޮތަށް ކަމަށެވެ.
މީގެ އިތުރުން ރޯދަ ވީއްލުމުގެ އިންތިޒާމް ހަމަޖައްސާފައި ބަހައްޓަން ޖެހޭނީ ވެސް ގައިދުރުކޮށް ތިބެވޭނެ ގޮތަށް ކަމަށް ވެސް މިނިސްޓްރީން ވިދާޅުވިއެވެ.
މިސްކިތްތަކުގައި ރޯދަ ވީއްލުމަކީ ދިވެހިންގެ މެދުގައި ޒަމާނުއްސުރެ އޮންނަ އާދަކާދައެކެވެ. އެގޮތުން ކޮންމެ އަހަރަކު ވެސް އެތައް ސަތޭކަ ދިވެހިންނާއި ވަކިން ހާއްސަކޮށް ބިދޭސީން އަންނަނީ މިސްކިތްތަކުން ރޯދަ ވީއްލަމުންނެވެ. ނަމަވެސް ކޮވިޑް-19 އާ ގުޅިގެން މިދިޔަ ރޯދަ މަހު މިސްކިތްތަކުގައި ރޯދަ ވީއްލުމުގެ ހުއްދަ ދީފައެއް ނުވެއެވެ.
