ކައިބާންއަށް އޮސްޓްރޭލިއާއިން ވިސާ ހަމަޖައްސައިދީފި
ވިސާގެ މައްސަލައެއްގައި އޮސްޓްރޭލިއާއިން ޑީޕޯޓް ކޮށްލަން ކަނޑައެޅި ތިން އަހަރުގެ ދިވެހި ފިރިހެން ކުއްޖާ، ކައިބާން ޖަމްޝާދަށް ވިސާ ހަމަޖައްސައިދީފި އެވެ.
ކައިބާން އަށް ވިސާ ހަމަޖައްސައިދީފައި މިވަނީ އޮސްޓްރޭލިއާގެ ޑިޕާޓްމެންޓް އޮފް ފޮރިން އެފެއާޒް އެންޑް ޓްރޭޑްގެ ޑެޕިއުޓީ ސެކްރެޓަރީ ރިޗަޑް މޯޑްއާ ބައްދަލުކުރައްވާ ކައިބާން އަށް ވިސާ ހަމަޖައްސައިދިނުމަށް ފޮރިން މިނިސްޓަރު އަބްދުﷲ ޝާހިދު އެދިވަޑައިގެންފައިވަނިކޮށެވެ.
ޝާހިދު މިއަދު ކުރައްވާފައިވާ ޓްވީޓެއްގައި ވިދާޅުވީ ކައިބާން އަށް ވިސާ ހަމަޖައްސައިދީފައިވާތީ އޮސްޓްރޭލިއާގެ ފޮރިން މިނިސްޓަރާ އަދި އެ ގައުމުގެ ސަރުކާރަށް ޝުކުރު އަދާކުރާ ކަމަށެވެ. އަދި އުންމީދަކީ ކައިބާންއަށް ހެޔޮ ގޮތްތައް މެދުވެރިވުން ކަމަށް ވިދާޅުވެ އޮސްޓްރޭލިއާއިން ފަރުވާ ލިބޭނެ މަގު ތަނަވަސް ވެެގެން ދިއުން ކަމަށް ވިދާޅުވިއެވެ.
ކައިބާން ޖަމްޝާދަކީ ހީމޯފީލިއާގެ ސަބަބުން ލޭ ގަނޑުވުމުގެ މައްސަލަތަކަކާއި ވިހެއުމުގައި ވެސް ސިކުނޑިއަށް ގެއްލުންތަކެއް ލިބިފައިވާ ކުއްޖެކެވެ. އޮސްޓްރޭލިއާއަށް އުފަން ކައިބާންއަށް ވިސާ ނުދީ ޑިޕޯޓް ކުރަނީ އޮސްޓްރޭލިއާގެ ސަރުކާރުގެ ޚަރަދުގައި ކައިބާންއަށް ބޭސްފަރުވާ ކުރާނަމަ ބޮޑު ޚަރަދެއް އެ ގައުމުން ކުރަން ޖެހޭ ކަމެއް ބުނެއެވެ.
