ވިއްސާރައިގައި އެންމެ ބޮޑު ގެއްލުމެއް ލިބިފައި ވަނީ އައްޑޫއާއި ފުވައްމުލަކަށް: އެންޑީއެމްއޭ
ރާއްޖެއަށް މިހާރު ކުރަމުން މިދާ ވިއްސާރައިގައި އެންމެ ބޮޑު ގެއްލުމެއް ލިބިފައި ވަނީ އައްޑޫ ސިޓީއަށާއި ފުވައްމުލަކު ސިޓީއަށް ކަމަށް ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ވިދާޅުވެއްޖެއެވެ.
އެންޑީއެމްއޭގެ ޑެޕިއުޓީ ޗީފް އެގްޒެކްޓިވް އުމަރު ފިކުރީ ހާމަ ކުރައްވައިފައިވާ ގޮތުގައި އައްޑޫގެ 176 ގެއަކަށް ފެން ވަދެ އެކިވަރުގެ ގެއްލުން ލިބިގެން ރިޕޯޓްކޮށްފައި ވެއެވެ. އަދި ފުވައްމުލަކުން 270 ގެއަކަށް ގެއްލުން ވެގެން ރިޕޯޓުކޮށްފައިވާ ކަމަށް ވެސް މައުލޫމާތު ދެއްވާފައިވެއެވެ.
ރާއްޖޭގެ އެކިކަންކޮޅުތަކަށް މިހާރު ކުރަމުން ދާ ވިއްސާރައިގެ ސަބަބުން ބައެއް ރަށްރަށަށް އުދަ އަރައި ފެންބޮޑުވުން ފަދަ ހާދިސާތައް ވެސް ވަނީ ކުރިމަތިވެފައެވެ. އުދަ އަރައިގެން މައިގަނޑު ގޮތެއްގައި ރިޕޯޓު ކޮށްފައި ވަނީ ހއ. އަތޮޅުން ފެށިގެން ޅ. އަތޮޅާ ދެމެދުގައިވާ ރަށްތަކަށެވެ.
އެންޑީއެމްއޭއިން މައުލޫމާތު ދީފައިވާ ގޮތުގައި ރާއްޖެ އަށް ކުރާ ވިއްސާރައިގައި ރޭ 10:00 ހަމައަށް ރާއްޖޭގެ 35 ރަށަކުން އެކި ވަރުގެ ގެއްލުން ލިބިގެން އެ އޮތޯރިޓީއަށް ރިޕޯޓް ކޮށްފައިވެއެވެ.
