ނަފްސާނީ ބަލީގެ ބައެއް ފަރުވާތަކަށް އާސަންދަ ލިބޭގޮތަށް ހަމަޖައްސައިފި
ނަފްސާނީ ބަލީގެ ބައެއް ފަރުވާތަކަށް އަންނަ މަހުން ފެށިގެން އާސަންދަ ލިބޭނެ އިންތިޒާމު ހަމަޖައްސައިފިއެވެ.
އާސަންދައިން ނެރުނު ނޫސް ބަޔާނެއްގައި ބުނެފައިވަނީ، އަމިއްލަ ކްލިނިކުތަކާއި ހޮސްޕިޓަލުތަކުން ފޯރުކޮށްދޭ ނަފްސާނީ ބަލީގެ ބައެއް ފަރުވާތައް، މިފެށޭ މަހުން ފެށިގެން އާސަންދަ ސްކީމުގެ ތެރެއިން ލިބޭނެ އިންތިޒާމު ހަމަޖައްސާފައިވާ ކަމަށެވެ.
އާސަންދައިގެ ދަށުން ނަފްސާނީ ބަލިތަކަށް ފަރުވާ ކުރެވޭނެ އިންތިޒާމުތައް ހަމަޖެއްސުމަކީ ރައީސް އިބްރާހިމް މުހައްމަދު ސޯލިހުގެ ރިޔާސީ ވައުދެކެވެ.
އާސަންދައިގެ ދަށުން ފަރުވާ ކުރެވޭ ނަފުސާނީ ބަލިތަކުގެ ތެރޭގައި، ސައިކޮލޮޖިސްޓް ކޮންސަލްޓޭޝަން، ސައިކޮލޮޖިކަލް އެސެސްމަންޓުގެ އިތުރުން ސައިކޮލޮޖިކަލް ތެރަޕީ ހިމެނެއެވެ.
މީގެ އިތުރުން، ޕްރައިވެޓު ހޮސްޕިޓަލުތަކާއި ކުލިނިކުތަކުން ނަފުސާނީ ބަލިތަކުގެ ހިދުމަތް ހޯދުމަށް އާސަންދައިގެ ދަށުން 5،000 ރުފިޔާ އަހަރަކަށް ހަމަޖައްސާފައިވާނެ ކަމަށްވެސް އާސަންދައިން ވަނީ ބުނެފައެވެ.
ނަފްސާނީ ބަލިތަކަށް ފަރުވާދޭން ހާއްސަ މަރުކަޒެއް މައި ހޮސްޕިޓަލް، އައިޖީއެމްއެޗްގައި މިދިޔަ އަހަރުގެ މާޗު މަހު ވަނީ ހުޅުވައިފައެވެ.
