މަސްތުވެގެން މިސްކިތަށް އެރި މީހަކު އަނެއްކާ ވެސް ހައްޔަރަށް
މަސްތުގެ ހާލަތުގައި ހުރެ މިސްކިތަށް އެރި މީހަކު އަނެއްކާ ވެސް ހައްޔަރުކޮށްފިއެވެ.
އެމީހާ ހައްޔަރުކޮށްފައި ވަނީ ވިޔަފާރިވެރިންގެ މިސްކިތުން ރޭ 1:35 ހާއިރު ކަމަށް ފުލުހުން ވިދާޅުވިއެވެ. ހައްޔަރުކޮށްފައި ވަނީ 34 އަހަރުގެ ފިރިހެނެއް ކަމަށް ވެސް ފުލުހުން މައުލޫމާތު ދެއްވައެވެ.
އެމައްސަލަ ފުލުހުން ތަހުގީގް ކުރަމުން ދާއިރު މިދިޔަ ހޯމަ ދުވަހު ވެސް ފުލުހުން ވަނީ މަސްތުގެ ހާލަތުގައި ތިބި ކަަމަށް ތުހުމަތުވި 15 މީހަކު މާލޭގެ އެކި މިސްކިިތްތަކުން ހުއްޓުވައި ހައްޔަރު ކޮށްފައެވެ.
މި މީހުންގެ ބަންދާމެދު ގޮތް ނިންމަން ކޯޓަށް ހާޒިރު ކުރުމުން ހަތް މީހަކު ރިމާންޑް ސެންޓަރުގައި 15 ދުވަހަށް ބަންދު ކުރުމަށް ކޯޓުން ވަނީ އަމުރުކޮށްފައެވެ. އަދި 8 މީހަކު ކަސްޓޯޑިއަލް ޖަލެއްގައި ތިން ދުވަހު ބަންދުކޮށްފައި ބޭތިއްބުމަށް ވަނީ އަމުރުކޮށްފައެވެ.
މަސްތުގެ ހާލަތުގައި ހުރެ ރޭ މިސްކިތަށް އެރި މީހާ ހައްޔަރު ކުރި ވީޑިޔޯއެއް ވެސް ސޯޝަލް މީޑިޔާގައި ދަނީ ދައުރުވަމުންނެވެ.
ކޮވިޑް19ގެ ހާލަތު ގޯސްވެ މާލޭގައި ކާފިއު އިއުލާނު ކޮށްފައިވާއިރު މިސްކިތްތަކުގައި ނިދުމާއި އެއްޗެހި ދޮވުމާއި މަސްތުވާކަމުގެ ޝަކުވާ ވަނީ އިތުރުވެފައެވެ.
މަސްތުގެ ހާލަތުގައި ތިބެ މިސްކިތްތަކަށް އެރުމާއި މިސްކިތުގައި މަސްތުވާތަކެތި ބޭނުން ކުރުން އިތުރުވެފައިވާއިރު މިކަންކަން ހުއްޓުވުމަށް ފުލުހުން ވަނީ މަސައްކަތް ފަށައިފައި ކަމަށް ފުލުހުން ވިދާޅުވިއެވެ. އަދި މިފަދަ ކަންކަން ކުރާ މީހުން ހައްޔަރުކޮށް މައްސަލަ ތަހްގީގް ކުރާނެކަމަށް ފުލުހުން ވަނީ މީގެ ކުރިން ވެސް ވިދާޅުވެފައެވެ.
Ads by STO
