ގެދޮރުވެރިކުރުން: ސަރުކާރު ފްލެޓުތަކުގެ ފައިސާ ދެއްކުން 3 މަހަށް ފަސްކޮށްދެނީ
ސަރުކާރުން ހިންގަވާ "ގެދޮރުވެރިކުރުން" ޕްރޮގްރާމުގެ ދަށުން ދޫކޮށްފައިވާ ފްލެޓްތަކުން މަހުން މަހަށް ހައުސިން ޑިވެލޮޕްމަންޓް ފައިނޭންސް ކޯޕަރޭޝަން (އެޗްޑީއެފްސީ)އަށް ދައްކަން ޖެހޭ ފައިސާ ދެއްކުން ތިން މަހަށް ފަސް ކޮށްދިނުމުގެ މަސައްކަތް ކުރަމުން އަންނަ ކަމަށް ހައުސިން މިނިސްޓްރީން ވިދާޅުވެއްޖެއެވެ.
މިދިޔަ އަންގާރަ ދުވަހު ހުޅުމާލޭގައި ބޭއްވި ރަސްމިއްޔާތެއްގައި ހައުސިންގ މިނިސްޓަރު މުހައްމަދު އަސްލަމް ވިދާޅުވީ ކޮވިޑް-19އާ ގުޅިގެން ގިނަ އާއިލާތަކަކަށް މާލީ ގޮންޖެހުންތައް ކުރިމަތިވެފައިވާކަން އެނގިވަޑައިގަންނަވާ ކަމަށާއި އެކަމަށް ލުޔެއް ހޯދައިދިނުމުގެ ގޮތުން، ފައިސާ ދެއްކުން ތިން މަހަށް ފަސް ކުރުމަށް މަސައްކަތް ކުރައްވަމުން ގެންދަވާ ކަމަށެވެ.
"ސަރުކާރުން ހަވާލުކޮށްފައިވާ ކޮންޓްރެކްޓްގެ ދަށުން އެ ތަންތަނުގައި ދިރިއުޅޭ ރައްޔިތުން އެޗްޑީއެފްސީއަށް ލާރި ދައްކަމުން ގެންދާ. އަޅުގަނޑު މަސައްކަތް ކުރަމުން މިދަނީ އިތުރަށް އަދި ތިން މަހަށް އެ ބޭފުޅުން މަހުން މަހަށް ދައްކަން ޖެހޭ މިންވަރު ލަސްކުރުމަށް،" މިނިސްޓަރ އަސްލަމް ވިދާޅުވިއެވެ.
ކޮވިޑް-19ގެ ބަލިމަޑުކަމާ ހެދި މިދިޔަ އަހަރު މާލެ ސަރަހައްދުގައި އިއުލާނު ކުރި ފުރަބަންދާ ގުޅިގެން، އާންމުންނަށް ކުރިމަތިވި މާލީ ގޮންޖެހުންތަކުގެ ސަބަބުން ހައުސިން މިނިސްޓްރީން ވަނީ ގެދޮރުވެރިކަން ޕްރޮގްރާމުގެ ދަށުން ދޫކުރި 704 ފްލެޓާއި ސަރުކާރުން ހަވާލުކޮށްފައިވާ ކޮންޓްރެކްޓްގެ ދަށުން ރަށްރަށުގައި އެޅި ހައުސިން ޔުނިޓްތަކުގައި އުޅޭ މީހުންނަށް މީގެ ކުރިން ވެސް އެއް ފަހަރު މަހު ކުލި ދެއްކުން ފަސްކޮށްދީފައެވެ.
