މިނިވަންކަމަކީ ހިލޭ ލިބޭނެ އެއްޗެއް ނޫން: މިނިސްޓަރ އިމްރާން
މިނިވަންކަމަކީ ހިލޭ ލިބޭނެ އެއްޗެއް ނޫން ކަމަށާއި މިނިވަންކަން ހޯދުމަށާއި، ދެމެހެއްޓުމަށް ޓަކައި ވަރަށް ބޮޑު އަގެއް ދައްކަން ޖެހޭކަމަށް ހޯމްމިނިސްޓަރ އިމްރާން އަބްދުﷲ ވިދާޅުވެއްޖެއެވެ.
ރާއްޖޭގެ 56ވަނަ މިނިވަން ދުވަހުގެ މުނާސަބަތުގައި ދެއްވި ހާއްސަ ވީޑިޔޯ މެސެޖެއްގައި އިމްރާން ވިދާޅުވީ މިނިވަންކަން ދެމެހެއްޓުމަށް ވަރަށް ބޮޑު އަގެއް ދައްކަން ޖެހޭ ކަމަށާއި އެ އަގު ފުރިހަމައަށް ދެއްކުނު ބަޔަކަށް މެނުވީ މިނިވަން ކަން ނުލިބޭނެކަމަށެވެ.
"މިނިވަން ހޯދުމަށާއި މިނިވަންކަން ދެމެހެއްޓުމަށް ވަރަށް ބޮޑު އަގެއް ދައްކަން ޖެހޭ. އެ އަގު ފުރިހަމައަށް ދެއްކުނު ބަޔަކަށް މެނުވީ މިނިވަންކަން ނުލިބޭނެ. އަދި މިނިވަން ކަން ނުވެސް ދެމެހެއްޓޭނެ. އެހެންކަމުން މިނިވަންކަން ދެމެހެއްޓުމަށް ޓަކައި ދައްކަންޖެހޭ ފުރިހަމަ އަގު ދެއްކުމަށް މިނިވަންކަން ލިބިފައިވާ މުޖްތަމައެއްގެ ނުވަތަ އެގައުމެއްގެ އެންމެން އެކުގައި ތައްޔާރުވާން ޖެހޭ." މިނިސްޓަރ ވިދާޅުވިއެވެ.
އިމްރާން ވިދާޅުވީ މިނިވަންކަމަކީ މުޖްތަމައުގެ އެންމެން އެކުގައި ކުރާ މަސައްކަތުގެ ނަތީޖާ ކަމަށެވެ. އަދި މިިނިވަންކަން ދެމެހެއްޓޭނީވެސް އެންމެން އެކުގައި ކުރާ މަސައްކަތުން ކަމަށާއި މިނިވަންކަން ގެއްލިދަނީ މުޖްތަމައުގެ ބައިބައިވުމާ، ދެކޮޅުވެރިކަމާ، ދެބަސްވުމާއި، އަދާވާތްތެރިކަމުގެ ސަބަބުންކަމަށް މިނިސްޓަރ ވިދާޅުވިއެވެ.
"މިނިވަންކަން ގެއްލިގެންދާ މުޖުތަމައުގެ ، މިނިވަންކަން ގެއްލިގެންދާ ކޮންމެ ފަހަރެއްގައި ގެއްލިގެން ދަނީ އެ މުޖްތަމައުއެއްގައި ބައިބައިވުމާއި ދެކޮޅުވެރިކަމާއި ދެބަސްވުމާއި އަދާވާތްތެރިކަމުގެ ސަބަބުން. އެހެންކަމުން މިނިވަންކަން ދަމަހައްޓަން ބޭނުންވާ ކޮންމެ މުޖްތަމައެއްގައި ފުރިހަމަ އެއްބައިވަންތަކަމާއި އެކުވެރިކަމުގެ ރޫހް އާލާކުރަން ޖެހޭ" މިނިސްޓަރ އިމްރާން ވިދާޅުވިއެވެ.
މިއަދު ރާއްޖޭގައި ފާހަގަކުރަމުން މިދާ މިނިވަންދުވަހުގެ މުނާސަބަތުގައި ހޯމް މިިނިސްޓްރީއާއި ޕަބްލިކް ސާވިސް މީޑިޔާ ގުޅިގެން ދަނީ ހާއްސަ ޕްރޮގްރާމެއްް ގެނެސްދެމުންނެވެ.
