އަލިފާނުގެ ހާދިސާގައި ގެއްލުންވި އާއިލާއަށް 7،800 ރުފިޔާ ދީފި

ރޭ މއ.އެމްޓޭޝަން ގޭގައި ހިނގި އަލިފާނުގެ ހާދިސާގައި ހާލުގައި ޖެހުނު އާއިލާއަށް ނެޝަނަލް ޑިޒާސްޓަރ މެނޭޖްމަންޓް އޮތޯރިޓީން (އެންޑީއެމްއޭ) އެހީތެރިކަން ފޯރުކޮށްދީފިއެވެ.

Ads by MWSC

އެންޑީއެމްއޭއިން ވިދާޅުވީ، ރޭ ހިނގި އަލިފާނުގެ ޙާދިސާއާ ގުޅިގެން ވަގުތީ އެހީތެރިކަން ބޭނުންވި އާއިލާއަށް ރިލީފް އެހީގެ ގޮތުގައި 7،800 ރުފިޔާ ހަމަޖައްސައި ދީފައިވާ ކަމަށެވެ. އެއީ، ވަގުތީ ބޯހިޔާވަހި ކަމަށާއި، ކެއިން ބުއިން އަދި އަންނައުނު ހޯދުމަށް ދިން ފައިސާ ކަމަށް އެ އިދާރާއިން ހާމަކުރިއެވެ.

ރޭ 7:45 ހާއިރު ރޯވި އަލިފާންގަނޑު ، އެމްއެންޑީއެފް ފަޔާ އެންޑް ރެސްކިޔުއިން ގޮސް ނިއްވައިލައިފައި ވަނީ 8:04ކަންހާއިރުއެވެ. މި ހާދިސާގައި ރޯވި ކޮޓަރީގައި ހުރި ހުރިހާ އެއްޗެއް ވަނީ ބޭނުން ނުކުރެވޭ ވަރަށް އަނދައިފައެވެ. އަލިފާން ރޯވެފައި ވަނީ ކޮޓަރީގައި ހުރި އަންނައުނާއި ސޯފާ އަދި ގޮދަނޑީގައެވެ. އަލިފާން ރޯވި ސަބަބު އަދި ދެނެގަނެވިފައެއް ނުވެއެވެ.